DILI, 16 Janeiru 2026 (TATOLI)—Sekretáriu Estadu Formasaun Profisionál no Empregu (SEFOPE) atribui sertifikadu ba benefisiáriu na’in-113 iha enseramentu programa estájiu profisionál tinan 2025 ne’ebé kompostu husi tipu programa estájiu iha rai-li’ur, rai-laran no estájiu espesiál ba traballadór returnu.
Sekretáriu Estadu Formasaun Profisionál no Empregu, Rogério Araújo Mendonça, hateten SEFOPE liuhusi Dirasaun Nasionál Formasaun Profisionál kada tinan sempre realiza programa estájiu profisionál.
“Objetivu husi programa ne’e hodi bele ajuda joven foinsa’e sira-ne’ebé mak seidauk hetan sira-nia esperiénsia servisu nune’e ho programa ne’e bele ajuda mellora sira-nia kapasidade (skill) liuhusi área ne’ebé sira prefere ba,” nia informa ba jornalista sira iha salaun Beach Garden, ohin.
Tinan ida-ne’e, nia dehan, SEFOPE planeia sei kontinua fasilita programa ida-ne’e ba joven sira bazeia ba orsamentu ne’ebé aloka ba sira.
Aleinde ne’e, nia hato’o agradesementu ba empregadór sira-ne’ebé simu estajiáriu sira hodi halo prátika servisu tuir área ne’ebé sira hili.
Iha oportunidade ne’e, iha estajiáriu na’in-ualu (8) mak hetan kontratu kedas husi empreza Dili Development Company, Lda-Timor-Plaza, hafoin hala’o estájiu profisionál iha rai-li’ur Jogjakarta (Indonézia) durante fulan tolu (3).
Xefe Unidade Formasaun no Kapasitasaun iha FDCH, Prudencio Dias Ribeiro, hato’o agradesementu ba SEFOPE ne’ebé iha polítika atu bele fó kontinuasaun ba kapasitasaun rekursu umanu no hamenus dezempregu rai-laran.
“Saida mak ita-boot sira aprende ne’e inísiu husi prosesu dezenvolvimentu konstrusaun nasaun, tanba ne’e aproveita didi’ak esperiénsia ne’ebé imi hetan durante hala’o estájiu profisionál iha rai-laran nomós iha rai-li’ur,” nia dehan.
Tinan oin, nia hateten, sira labele kontinua ona programa ida-ne’e tanba husi FDCH nia papel de’it foka de’it ona ba área bolsa estudu nian, maibé ba oin SEFOPE sai hanesan membru permanente konsellu administrasaun FDCH.
Adjunta Jestór Rekursu Umanu DDC, Yanti Kusdewi hato’o agradesementu ba SEFOPE tanba fó fiar ba sira hodi partisipa iha inisiativa nasionál ne’e, konfiansa nu’udar parte iha prosesu selesaun no dezenvolvimentu ba profisionál joven sira.
“Programa ne’e reprezenta la’ós de’it kumprimentu internatu, maibé realiza vizaun ne’ebé partilla entre instituisaun Governu nian ho parséria setór privadu nian, kolaborasaun no kompromisu ne’e firme ba dezenvolvimentu rekursu umanu,” nia hateten.
Tanba ne’e, tuir nia, empreza DDC nafatin komprometidu tebes ho apoiu inisiativa sira-ne’e atu investe rekursu umanu, fiar katak kolaborasaun ne’e bele kontinua hodi alarga oportunidade, fortelese indústria sira no empodera jerasaun profisionál foun sira.
Orsamentu ne’ebé finánsia ba programa estájiu profisionál hetan apoiu husi Fundu Dezenvolvimentu Kapitál Umanu (FDCH) ho montante rihun $30 no fundu balun apoiu diretamente husi Sekretária Estadu Formasaun Profisionál Empregu liuhusi tranaferénsia públika ho montante rihun $75.
Totál aplikante ne’ebé SEFOPE rejista husi munisípiu hotu-hotu durante prosesu rekrutamentu hamutuk 643 kandidatu, iha selesaun teste kandidatu na’in-143 mak tuir maibé rezultadu finál aplikante 113 mak pasa iha programa ida-ne’e.
Jornalista : Alexandra da Costa
Editór : Cancio Ximenes
