DILI, 16 Janeiru 2026 (TATOLI)–Sentru triajen ba kankru serviks iha Sentru Saúde Vera Cruz, Dili, rejista ona feto ho virus Papiloma Umanu (HPV) hamutuk 141 dezde inaugurasaun iha marsu 2025.
“Ami halo triajen ba feto ho idade entre 30 to’o 49 ba HPV hamutuk 1.133 ne’e, na’in-141 pozitivu maibe na’in-132 de’it mak halo tratamentu no na’in-neen (6) seluk seidauk halo tratamentu tanba sira dook husi Dili,” Xefe kankru serviks, Francisco Conceição Alves, hateten ba Agência Tatoli iha nia kna’ar fatin, ohin.
Nia hateten, sira-ne’ebé pozitivu ba Vírus Papiloma Umanu (HPV) sei simu karta atu nune’e bele halo fali teste iha tinan tuir mai hodi konfirma katak rezultadu mantein pozitivu ka negativu, maibé se rezultadu pozitivu nafatin mak tratamentu sei kontinua to’o rekuperasaun kompletu.
Responsável ne’e hatutan, oras konsulta ba sira-ne’ebé pozitivu ba Virus Papiloma Umanu mak kada loron-tersa no kinta-feira.
“Iha ami-nia esforsu atu kombate no prevene Vírus Papiloma Umanu (HPV), ami hala’o teste triajen no vasinasaun sira hasoru Vírus Papiloma Umanu iha eskola ba labarik sira ho idade 11 to’o 14,” nia dehan.
Xefe ne’e informa, feto entre tinan 30 to’o 49 tenke halo teste HPV sedu tanba virus ne’e bele kauza kankru serviks.
Jornalista : Felicidade Ximenes
Editór : Cancio Ximenes
