DILI, 16 Janeiru 2026 (TATOLI)–Tribunál Rekursu (TR) liuhusi Juíz koletiva, Sesta ne’e, hatún ona akordaun hodi aplika pena multa ba arguidu na’in-tolu hanesan Aguidu Agostinho, Tomas Punef no Tomas Tavares ba krime sukuestru hodi rezulta José Bernardo mate iha sela Komandu Polísia Nasionál Timor-Leste (PNTL) Munisípiu Dili, iha tinan 2022.
Asistente husi matebian José Bernardo, Advogada Privada Adelina Mello de Araújo, haktuir, Tribunál Judisiál Primeira Instánsia Dili (TJPID) antes ne’e foti desizaun absolve arguidu na’in-tolu maibé hafoin parte Advogada halo rekursu hasoru desizaun, TR hasai akordaun hodi aplika pena multa ba arguidu sira.
“Tanba faktus provadu katak arguidu sira envolve duni krime sukuestru,” Adelina hateten ba Jornalista sira iha TJPID, Kolmera, Sesta ne’e.
Notísia relevante : Defeza hatama ona rekursu kona-ba kazu matebian José Bernardo
Nune’e, Asistente simu filafali desizaun foun husi TR “Ha’u foin mak simu ohin, ha’u foin asina ohin.”
Advogada Privada esplika, TR nia desizaun fó sai katak arguidu Agostinho no Tomas Punef selu multa $400, enkuantu Arguidu Tomás Tavares selu pena multa ho valór kuantia $500.
“Pena multa ne’e ho prazu loron 100. Arguidu Agostinho no Tomas Punef iha obrigasaun selu osan ho valór $4 kada loron, ne’ebé to’o loron 100 sira iha obrigasaun selu $400. Enkuantu Arguidu Tomas Tavares ne’ebé hein sela ne’e mak nia nia selu $5 kada loron durante loron 100. Ho nune’e konta hamutuk nia iha obrigasaun selu $500,” nia katak.
Jornalista : Natalino Costa
Editora : Julia Chatarina
