DILI, 17 Janeiru 2026 (TATOLI)–Sekretariu Estadu Komunikasaun Sosiál (SEKOMS), Expedito Dias Ximenes, hateten halibur hotu ona informasaun kona-ba Prezidente Rádiu Telivizaun Timor-Leste, Empreza Públika (RTTL, E.P), Elizeu Isaac Fernandes. hatudu katak automatikamente inkompatibilidade no desizaun ikus sei deside iha Konsellu Ministru.
Notísia Relevante: Prezidente RTTL, E.P relata progresu servisu ba Xefe Estadu
“Dekretu-Lei nú. 42/2008 hateten klaru ona, se bainhira ema ida-ne’ebé asume hela kargu membru ka Prezidente RTTL nia labele sai dirijente Partidu Polítika ida-nian. Irmaun Elizeu asume ona kargu ou dirijente iha Partidu ida hanesan Vise-Primeiru Sekretariu Ezekutivu ba Organizasaun Juventude Partidu CNRT, entaun automatikamente hanaran inkompatibilidade, katak nia labele asume tan kargu ida Prezidente RTTL,” Sekretariu Estadu Komunikasaun Sosiál (SEKOMS), Expedito Dias Ximenes, hateten ba jornalista sira liuhusi komunikadu imprensa iha Elegendariu, Lecidere, sábadu ne’e.
Nia dehan, bainhira rona informasaun barak iha sesta (16 Dezembru) foin lalais remata serbisu ida iha Bali-Indonézia fila mai Dili hasoru malu kedan ho Primeiru-Ministru, Kay Rala Xanana Gusmão hodi hato’o relatóriu kona-ba asuntu Prezidente RTTL, E.P.
“Ha’u fila husi serbisu ida sesta loraik, iha tempu ne’e kedan ha’u hasoru malu ho Primeiru-Ministru, atu halo relatóriu kona-ba situasaun Prezidente RTTL nian tanba diskusaun barak iha públiku. Ba ha’u, orientasaun Primeiru-Ministru nian orden hanesan membru Governu ne’ebé tau matan ba orgaun komunikasaun sosiál hotu, inklui RTTL no TATOLI ne’ebé tutela mai SEKOMS,” nia dehan.
Nia hatutan, bainhira hasoru malu ho Xefe Governu hatun ona orientasaun katak, bainhira Prezidente RTTL sai ona dirijente ba Partidu Polítiku ida mak ne’e inkompatibilidade no inkompativel atu asume tan kargu nu’udar Prezidente RTTL.
“Ida-ne’e mak orientasaun ne’ebé Primeiru-Ministru fó mai ha’u, tanba Prezidente RTTL inkompatibilidade mak nia prosesu hotu tenke liu husi Konsellu Ministru. Iha Konsellu Ministru tuir mai ha’u sei aprezenta proposta,” Expedito hateten.
Iha okaziaun ne’e nia fó ezemplu iha tinan rua ba kotuk, bainhira Prezidente RTTL sesante José António Belo asumi kargu hanesan dirijente iha Partidu PLP mak hetan kedan ezonerasaun tuir artigu 13 iha Dekretu-Lei nú. 42/2008.
Tanba ne’e, kona-ba Prezidente RTTL Elizeu Isaac Fernandes nian, SEKOMS Expedito Dias Ximenes konfirma ona ho Partidu CNRT inklui Sekretariu Jerál Francisco Kalbuadi Lay inklui komunidade mídia hotu liuliu seniór sira iha mídia, Konsellu Imprensa rasik, organizasaun jornalista sira katak nia rasik tenke hato’o proposta ba Konsellu Ministru.
“Nune’e mak ita hotu hein iha prosesu tuir mai iha Konsellu Ministru mak iha kompeténsia atu nomeia no ezonera,” nia dehan.
Tuir artigu 13 Dekretu-Lei nú. 42/2008 ne’ebé transfoorma RTTL husi serbisu públiku ba Empreza Públiku, iha alinea 1 hateten atu sai membru konsellu administrasaun RTTL ema-ne’e labele mai husi funsionariu públiku, ajente administrasaun públika.
Iha alinea 2 haktuir, bainhira ema ida atu sai membru konsellu administrasaun RTTL, ema-ne’e labele hanesan dirijente partidu polítiku ida.
Notísia Relevante: Elizeu Isaac Fernandes asume knaar nu’udar Prezidente foun RTTL, E.P
Jornalista : Hortencio Sanchez
Editór : Cancio Ximenes
