VIKEKE, 19 Janeiru 2026 (TATOLI)—Diretór Programa Nasionál Dezenvolvimentu Suku (PNDS) Munisípiu Vikeke, Francisco Soares Varela, informa tinan 2026 PNDS Munisípiu Vikeke sei implementa obra hamutuk 77 ne’ebé sei implementa iha suku 38.
“Iha tinan ida-ne’e ita sei implementa obra PNDS hamutuk hamutuk 77. Ami iha ona preparasaun, ne’ebé tama fulan-Fevereiru ne’e ami sei halo prosesu levantamentu ba obra hirak-ne’e, depoiz konkluidu ita hahú implementa,” Francisco Soares Varela ba TATOLI iha Postu Vikeke Vila, Segunda ne’e.
Diretór ne’e hatutan, tuir planu, fulan-Marsu hahú asina kontratu ho empreza fornesedór materiál fabrikadu no la’ós fabrikadu sira no molok implementa PNDS Munisípiu Vikeke sei hala’o uluk sosializasaun ba autoridade suku sira.
Francisco haktuir obra sira-ne’e mak hanesan obra regulár hamutuk unidade 38, obra adisionál konstrusaun uma merenda eskolár unidade 18 ba eskola ensinu báziku sentral sira, espansaun sede suku hamutuk unidade 21. Husi totál obra hamutuk 77 ne’e, PNDS sei gasta millaun $1-resin.
Aleinde ne’e, nia relata, kona-ba obra PNDS 40 ne’ebé implementa ona iha tinan 2025 daudaun ne’e maioria atinje ona 100%.
Jornalista: Vitorino Lopes da Costa
Editór: Xisto Freitas da Piedade
