Ai-moruk item lima haruka ba Austrália sei iha prosesu teste nia laran
DILI, 19 Janeiru 2026 (TATOLI)—Diretór Nasionál Farmásia Produtu no Médikamentu, Delfim Ferreira, hateten iha 2025 ne’e Ministériu Saúde haruka ona ai-moruk item lima ba halo teste iha nasaun Austrália no item ida mai rezultadu hatudu katak laiha kontaminasaun no item haat sei iha prosesu teste nia laran.
“Ita item lima, ida mak foin haruka mai rezultadu tinan kotuk ita haruka iha Abríl, tanba ita nia akordu ho ita ho Austrália ne’e hotu iha Juñu, depois ita halo komunikasaun prepara nia estensaun, no sira teste ita hetan nia resultadu ne’e iha 15 Dezembru foin mak iha item ida, aimoruk ibunprofen nia resultadu di’ak no la iha kontaminasaun,” Delfim Ferreira hateten ba jornalista sira iha nia kna’ar fatin, Lahane, ohin
Nia esplika, ai-moruk xarope Ibuprofen ne’e ba pasiente sira-ne’ebé mak ho idade tinan rua mak bele konsume maibé nia resultadu hatudu katak laiha kontaminasaun.
“Ai-moruk ne’e di’ak no ai-moruk ne’e sei eziste hela, nia prazu ne’e to’o 2027. Ai-moruk item haat sira seluk, ita hein nia rezultadu seidauk mai. Tanba ne’e husu komunidade ne’ebé mak konsumu ona ai-moruk Ibuprofen ne’e kontínua konsumu tanba laiha kontaminasaun ida. Ba tinan ida-ne’e, ita sei hein orsamentu, ita bele haruka tan maibé ita hein mós karta husi Austrália. Tanba, ita uza ida-ne’e, ita uza hela estensaun nian ne’e husi períodu Juñu mai to’o Dezembru ne’e mak ita la’o hela. Ita hein hela karta mai ne’e, ita bele haruka no orsamentu mós ita prevee atu haruka amostra ba hodi selu taxa,” nia esplika
Nia dehan, ai-moruk item hirak mak Ministériu Saúde atu haruka tan iha tinan 2026 ne’e sei haree tanba sei hein karta husi Austrália.
“Ita bele dehan, iha 2025, ai-moruk item lima de’it no 2024 mak iha item 10, nia rezultadu fó sai ona iha momentu ne’eba,” nia hateten.
Entretantu, ai-moruk item lima (5) ne’ebé mak Ministériu Saúde haruka Laboratóriu Therapeutic Goods Administration Austrália mak hanesan Flamex Ibuprofen Suspension BP 100 mg/5ml, Ciproshar 500 Ciprofloxacin tablets USP 500 mg, Cloxaphar 500 Cloxacilin sodium Capsules USP, Generics Plus Chloramphenicol Sodium Succinate for Injection BP1 gm no Nifedipine Extented Release tablets 10 mg.
Jornalista : Felicidade Ximenes
Editór : Cancio Ximenes
