IGEADI orienta ekipa téknika normaliza-hasai sedimentasaun iha estrada Sarlala Aileu
DILI, 19 Janeiru 2026 (TATOLI)—Prezidente Institutu Jestaun Ekipamentus Apoiu Dezenvolvimentu Infraestrutura, Institutu Públiku (IGEADI, I.P), Ana Paula da Cruz, informa nia parte orienta ona ekipa téknika sira ba halo levantamentu dadus hodi define apoiu emerjénsia, atu normaliza no hasai sedimentasaun iha Estrada Sarlala Aileu.
“Kona-ba rai monu iha dalan foun parte bee-tudak Aileu nian, ha’u orienta ona ekipa tékniku IGEADI inklui MOP nian ba ona hodi haree kondisaun iha ne’ebá, atu define lolós ekipamentu ne’ebé atu uza hodi halo apoiu emerjénsia,” Prezidente Institutu Jestaun Ekipamentus Apoiu Dezenvolvimentu Infraestrutura (IGEADI), Ana Paula da Cruz, hateten ba Agência Tatoli liuhusi telefónika, ohin.
Nia dehan, prosesu ne’e lalais de’it no ohin tékniku sira foti dadus hodi halo analiza hotu tiha mak foin kontinua kedas normaliza ka hasai sedimentasaun ne’ebé taka tiha iha estrada ne’e.
“Entaun, ami sei haruka ekipa brigada Samba 09 ne’ebé daudaun ne’e hala’o hela servisu iha Maubara no sei apoiu mós husi brigada Dili, ne’ebé tékniku sira hala’o hela servisu identifikasaun dadus atu tau bronjon ka zumbu de’it ka oinsá,” nia esplika.
Nia onforma, aleinde ne’e iha Laulara maibé iha parte Leorema Líkisa nian mós dalan kotu tiha ona no tékniku sira ba haree ona, tempu badak sei fahe ekipa brigada ne’ebé daudaun ne’e halo hela servisu iha Maubara balun tenke ba atende iha ne’ebá, tanba nia tama iha área brigada Samba 09 nian.
Jornalista : Alexandra da Costa
Editór : Cancio Ximenes
