DILI, 19 Janeiru 2026 (TATOLI)–Embaixadora Timor-Leste ba Nova Zelándia, Idelta Rodrigues, hateten kooperasaun bilaterál entre Timor-Leste no Nova Zelándia kontinua hetan relevánsia, reflete esforsu nasaun nian hodi hametin parseria estratéjiku sira-ne’ebé kontribui ba dezenvolvimentu ekonómiku, edukasionál no sosiál.
“Dezde restaurasaun independénsia, Timor-Leste harii ona parseria ho nasaun oioin, ami-nia misaun iha Nova Zelándia mak atu kontinua serbisu ne’e, hametin amizade no implementa programa prioridade sira ne’ebé lori benefísiu konkretu ba nasaun rua,” Embaixadora ne’e hateten liuhusi programa entrevista eskluziva ne’ebé Agência Tatoli realiza iha Dili, segunda ne’e.
Nia dehan, entre área prioridade lima ne’ebé embaixada identifika, destaka promosaun empregu ba timoroan sira iha Nova Zelándia liuhusi programa traballadór nian.
“Prepara traballadór timoroan sira ba oportunidade foun ne’e esensiál, liuliu agora ho Timor-Leste nia integrasaun iha ASEAN hasa’e kompetitividade no kapasidade ba ita-nia sidadaun sira,” nia dehan.
Idelta Rodrigues afirma mós katak, kooperasaun inklui mós programa sister-city, ne’ebé dezenvolve iha parseria ho Ministériu Administrasaun Estatál no autoridade munisípiu sira, hodi permite hametin dezenvolvimentu lokál no envolve Nova Zelándia nu’udar parseiru ativu iha kreximentu komunidade timoroan sira-nian.
Iha área edukasaun, diplomata ne’e mensiona katak embaixada konsege hasa’e maka’as númeru bolsa estudu ba joven timoroan sira kompara ho tinan hirak liubá, ho de’it bolsa estudu 10 to’o 12 ba estudante sira iha nasaun ne’ebá. Daudaun ne’e, estudante hamutuk 32 mak hetan benefísiu husi programa Bolsa Estudu Manaki.
Aleinde bolsa estudu ba tempu naruk, embaixada iha parseria ho Governu Nova Zelándia, promove formasaun ba tempu badak ba funsionáriu públiku, forsa defeza no ofisiál polísia komunitária, hodi hametin abilidade profisionál no abilidade iha lian Inglés.
Prioridade sira seluk inklui kriasaun eskola maun-alin sira hodi apoia diversifikasaun ekonómika no dezenvolvimentu munisipál, no mós promove transformasaun dijitál, hodi garante katak benefísiu sira to’o ba komunidade lokál sira.
“Haforsa ami-nia kooperasaun ho Nova Zelándia hanesan krusiál. Ami hakarak hatudu katak Timor-Leste iha rekursu umanu kualifikadu sira no iha kapasidade hodi kontribui maka’as iha kontestu globál,” nia dehan.
Jornalista : Hortencio Sanchez
Editór : Cancio Ximenes
