DILI, 19 Janeiru 2026 (TATOLI)—Diretór Nasionál Ensinu Sekundáriu Jerál iha Ministériu Edukasaun (ME), Benjamin Fernandes hateten ekipa Ministériu Edukasaun klarifika taka klase paralela Ensinu Sekundáriu Uagia ba komunidade iha Postu Administrativu Ossú, Munisípiu Vikeke.
“Horisehik ami simu rekomendasaun lubuk ida, maibé sei la anula desizaun. Nune’e, estudante sira husi klase paralela Uagia sei konsetra hotu iha eskola sentrál Olokasa hodi tuir prosesu aprendizajen,” nia dehan ba TATOLI iha nia kna’ar fatin, Vila-Verde, Segunda ne’e.
Benjamin Fernandes deklara, bá-oin ministériu sei aplika mós regra referida ba eskola filiál bainhira la prenxe kritériu (estudante menus).
Nia hateten klase paralela hirak-ne’e taka bazeia ba analiza Ministériu Edukasaun nian, tuir Diploma Ministeriál nú. 23/2025, 13 Agostu, hatuun katak eskola hirak-ne’e la prenxe ona rekizitu atu kontinua eziste hanesan klase paralela ba eskola sira.
Notísia relavante: Movimentu Juventude Ossú sosilita ME anula desizaun taka Klase Paralela Sekundária Olokasa
Diretór ne’e haktuir, hafoin diploma ministeriál tun, iha 14 Dezembru 2025, diresaun nasionál organiza kedan workshop ida, hodi disemina informasaun ba diretór munisípiu, superintendente no mós diretór eskola sira, maibé Vikeke mak rejeita atu taka sira nia klase paralela.
“Imi haree loron hirak liubá sira halo asaun pasífika, maibé ministériu responde kedan. Horisehik ha’u rasik lidera ekipa ida kompostu husi Inspetór Jerál, Gabinete Jurídiku no Gabinete Avaliasaun Lisensiamentu no Akreditasaun, ami dezloka kedan ba Vikeke hodi ko’alia direta ho reprezentante inan-aman, autoridade lokál, kona-ba diploma ministeriál ne’ebé públika ona katak klase Uagia la prenxe rekizitu,” Benjamin subliña.
Nia esplika, tuir rekizitu, bainhira atu estabelese klase paralela ida, tenke prenxe klase ida iha turma rua ka tolu, tantu husi 10.⁰ to’o 12.⁰ ano, no kada turma tenke akumula estudante 35 to’o 45.
“Razaun saida mak mak ida-ne’e akontese? Ha’u atu hateten katak ida-ne’e akontese tanba ita atu fahe karga orária ba manorin sira. Se 10.⁰ ano iha turma ida de’it labele. Semana ida manorin ne’e hanorin oras rua de’it ida-ne’e labele, tanba ne’e ME hasai regra hodi taka eskola sira-ne’e,” nia dehan.
Entretantu, klase paralela ne’ebé ME taka kompostu husi Munisípiu Ermera klase paralela Ponilala, Manufahi klase paralela Babulu ho klase paralela Fahinehan, Vikeke klase paralela Uagia no Baukau ESJ Filiál Kilik Waigae, klase paralela Buawa-Lavateri no klase paralela ida iha Seisál.
Tuir dadus Ministériu Edukasaun, totál eskola sekundária jerál iha teritoriu nasionál hamutuk 74, kompostu husi sekundáriu filiál no eskola individuál.
Jornalista: Osória Marques
Editór: Xisto Freitas da Piedade
