DILI, 19 Janeiru 2026 (TATOLI) – Governu liuhusi Ministériu Negosiu Estranjeiru no Kooperasaun (MNEK) segunda ne’e iha Otél Palm Spring Fatuhada Dili lansa semináriu ba investimentu no komersiu internasionál iha rejiaun ASEAN.
Notísia Relevante: KM deside Elisa Maria da Silva sai embaixadora TL ba ASEAN
Semináriu ne’e ho objetivu atu hametin entendinetu no kooperasaun atu atrai investimentu internasionál partikularmente ho nasaun membru ASEAN sira.
“Ita hatene katak, iha ASEAN pilár tolu hanesan Sosiu Kulturál, Defeza Seguransa no Ekonomia, entaun ekonomia pilár ida ne’ebé importante ba Timor-Leste atu kompriende liutan mekanizmu atu alina ita-nia instrumentu legál interna, nune’e bele estabelese mekanizmu ida-ne’ebé di’ak atu nune’e investór sira bele mai investe iha ita-nia nasaun,” Diretora Jerál Asuntu ASEAN Elisa Maria da Silva hateten ba TATOLI hafoin remata lansamentu semináriu ne’e.
Nia dehan, semináriu ne’e importante tebes ba Timor-Leste liuliu ba ofisiál hirak ne’ebé serbisu iha lina Ministeriál sira hanesan Trade Invest, iha Komersiu, AIFAESA no seluk tan atu kompriende didi’ak mekanizmu hotu nune’e bele estabelese rasik Timor-Leste nia mekanizmu bazeia ba estandár ASEAN nian.
“Ita iha péritu na’in-rua (2) mai husi Malázia, sira mak sei fó ou fahe sira nia esperiensia kona-ba investimentu nia mekanizmu liliu iha lei sira kona-ba investimentu tanba sira iha esperiensia barak, sira bele fahe sira nia esperiensia atu nune’e ita bele kria ita-nia mekanizmu iha rai laran atu bele hametin ita-nia sistema nune’e ita bele dezenvolve ita-nia ekonomia,” Elisa tenik.
Iha fatin hanesan, Embaxadór Malázia iha Timor-Leste, Dato Amarjit Sarjit Singh hateten, Malázia kontinua apoiu nafatin Timor-Leste oinsa dezenvolve setór ekonomia.
“Malázia esforsu ona atu lori Timor-Leste tama ba membru plenu ASEAN, maibé ami sei la husik Timor-Leste mesak, ami sei kontinua suporta nafatin Timor-Leste tuir nesesidade ne’ebé iha no tuir prioridade ne’ebé Governu iha,” Embaxadór ne’e tenik.
Atividade ne’e sei kontinua ba oin tuir prioridade ne’ebé Timor-Leste iha oinsa atu prepara kondisaun hotu atu simu investór sira husi rai-liur atu mai halo investimentu iha nasaun ne’e.
Eventu ne’e, hetan apoiu másimu husi Embaxada Japaun iha Timor-Leste liuliu nia Ajénsia JICA no Embaxada Malázia iha Timor-Leste.
Jornalista: Hortencio Sanchez
