DILI, 19 Janeiru 2026 (TATOLI)-Prezidente Repúblika (PR), José Ramos-Horta, hato’o karta ba Parlamentu Nasionál hodi informa ninia viajen privada bá Davos, Suísa.
Tuir konformidade iha dispostu iha númeru 3 artigu 80 Konstituisaun ho meiu ne’e PR informa sei auzente iha territóriu nasionál ho dezlokasaun privada traballu bá Davos, Suísa, entre 19 até 25 Janeiru 2026 inkluziva.
Ho programa partisipasaun iha eventu relevansia boot ba Timor-Leste hanesan fórum ekonómiku mundiál ne’ebé anualmente reúne Xefe Estadu no Governu, altu dignatáriu internasionál.
Fórum ekonómiku ba tinan ida-ne’e ho tema “Espíritu Diálogu nian”, konvoka líder globál sira husi Governu, empreendedór no sosiedade sivíl hodi partilla dezafiu jeopolítiku, ekonómiku no ambientál sira-ne’ebé urjente.
Prezidente Ramos-Horta nia partisipasaun subliña Timor-Leste nia kompromisu ba envolvimentu multilaterál ne’ebé konstrutivu no ninia papél proativu hodi fornese solusaun kolaborativa sira.
Durante vizita, Prezidente nia kompromisu sira sei foka ba tema krítiku sira relasiona ho dame, kreximentu inkluzivu no rejenerasaun ambientál.
Tuir oráriu, iha 21 Janeiru, Prezidente Ramos-Horta sei partisipa iha diálogu estratéjiku nivel aas nian, inklui enkontru informál ida husi Líder Ekonómiku Mundiál sira (IGWEL) kona-ba “Restaura Espíritu Diálogu iha Mundu ne’ebé fahe malu” no Diálogu ho Parte Interesada sira ho títulu “Tau Empreendedór sira iha Fatin ne’ebé Merkadu laiha.”
Presidente mós sei tuir sesaun ida-ne’ebé organiza husi Globál Citizen no Forbes.
Iha 22 Janeiru, Ramos-Horta sei hato’o diskursu prinsipál iha eventu paralelu importante rua mak “Plástiku Neutrál Globál: Transforma Poluisaun ba Serbisu no Infraestrutura”, sei ezamina hodi transforma krize poluisaun plástiku ba oportunidade ida ba empregu verde no infraestrutura sustentavel, no “Empregu Rejenerativu Millaun 100: Rekonstrui Ekonomia Lokál sira dezde Baze liuhosi Sistema Ai-han, Turizmu, no Asisténsia,” sei destaka modelu rejenerativu sira hanesan dalan sira ba restaurasaun ekolojia no ekonomia komunitária sira ne’ebé reziliente.
Itineráriu Prezidente nian inklui mós série enkontru bilaterál ho figura xave internasionál sira no prezensa iha Jantar Sidadaun Global.
“Iha mundu ida-ne’ebé dalabarak nakfera tanba konflitu no deskonfiansa, ‘Espíritu Diálogu’ la’ós de’it tema ida maibé nesesidade ida. Timor-Leste nia jornada rasik hanorin ita katak pás no prosperidade ne’ebé metin harii liuhusi konversa persistente no respeitoza no kompromisu kompartilladu ho bein-komún”, Xefe Estadu dehan iha nota ofisiál ne’ebé Tatoli asesu husi Palásiu Prezidensiál.
“Iha Davos, hau sei lori ita-nia povu nia lian, advokasia ba kooperasaun globál ne’ebé investe iha dame, fó kbiit ba empreendedór sira no proteje ita-nia planeta ba jerasaun sira iha futuru”. Katak.
Lembra durante tinan 2025, Parlamentu Nasionál halo aprovasaun ba asentimentu dezlokasaun vizita Estadu no ofisiál Prezidente Repúblika, José Ramos-Horta, hamutuk dala-11 hodi bá nasaun 11.
Aliende ne’e, PR mós informa ninia vizita privada balun ba rai-liur ba órgaun lejislativa ne’e.
Jornalista: Nelson de Sousa
Editora: Maria Auxiliadora
