OEKUSI, 19 Janeiru 2026 (TATOLI) – Primeiru-Ministru (PM), Kay Rala Xanana Gusmão, segunda ohin, oferese krús ida bá kapela São Alfonso Manunesi iha aldeia Bonemese suku Naimeko sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Kapela referida, sarani sira kontribui rasik tantu fíziku, finanseiru no materiál balun, hodi uza ba konstrusaun kapela ne’e, maibé seidauk bele finaliza tanba kbiit la to’o. Nune’e, PM Xanana deside apoia osan privadu ho montante $2.000,000 hodi bele finaliza nune’e sarani sira bele utiliza halo orasaun.
“Apresia tebes imi nia esforsu, hakarak, sakrifísiu lorloron nian. Ha’u mós kontente tanba hateke husi rohan ba rohan ha’u-nia feton, oan feto, mane no oan barak. Ne’e mak hatudu duni katuas sira-nia sakrifisiu boot halo kapela ne’e ba labarik sira. Tanba ha’u haree ida-ne’e produtu husi sarani sira ninian, ne’ebé ha’u apoia uitoan de’it osan $2.000 hodi finaliza tiha”, PM Xanana hateten hafoin entrega tiha Krús ba Sarani sira, iha Kapela São Alfonso, ohin.
Xefe Governu mós orgullu, tanba foin primeira-vez vizita iha fatin ne’e no kompromete katak bainhira kapela ne’e konkluidu ona, nia mak sei mai inaugura.
Biban ne’e, Xefe Governu mós husu ba Autoridade Lokál katak rekolla lista ferik no katuas sira ne’ebé seidauk simu pensaun idozu nian hodi bele Governu halo pagamentu.
Notísia relevante:Don Virgílio : Prezensa Krús Joven iha Timor-Leste hametin fiar no unidade
Katekista Kapela São Alfonsu Manunesi, Domingos Tanepo, senti orgullu ba apoia husi Primeiru-Ministru, tanba durante ne’e sarani sira mak apoia ho serbisu voluntáriamentu inklui kontribui finanseiru no materiál.
“Kapela ne’e ami rasik mak deside hodi harii iha ami-nia bairru, entaun ami sarani tomak mak kontribui, husi badaen ami mak serbisu rasik, hamutuk osan no kontribui mós materiál, atu nune’e bele finaliza, maibé ami sente todan, tanba ne’e ami agradese ba Avo Nana bele tulun netik ami,” nia orgullu.
Observasaun Jornalista Ajénsia Tatoli,I.P, hafoin atividade ne’e ramata, Primeiru-Ministru entrega farda no bola ba foin-sa’e sira iha bairru Manunesi hodi bele uza prátika desportu iha sira-nia aldeia.
Jornalista: Abílio Elo Nini
Editór: Rafael Ximenes de A. Belo
