Prosesu reabilitasaun estrada Laleia iha ona faze aprovizionamentu
DILI, 19 Janeiru 2026 (TATOLI)—Xefe Planeamentu Ministériu Obra Públika, Tito Edegar, informa prosesu reabilitasaun estrada nasionál iha Postu Administrativu Laleia, Munisípiu Manatutu ne’ebé atu kotu ne’e, daudaun ne’e iha ona faze aprovizionamentu.
“Tempu badak sei fó sai rezultadu. Tanba, materiál sira mós hahú teste ona iha laboratóriu entaun presiza aprezenta ba Ministru tamba ne’e kategória projetu emerjénsia,” Xefe Planeamentu Ministériu Obra Públika, Tito Edegar, hateten ba Agência Tatoli liuhusi telefónika, ohin.
Ba kestaun ne’e, Prezidente IGEADI, I.P, Ana Paula da Cruz, informa kona-ba estrada iha Laleia ne’e sira sei labele halo normalizasaun emerjénsia tnmba ne’e estrada nasionál no iha empreza ida mak sei responsavel ba asuntu ida-ne’e.
“Tanba se bainhira kompañia laiha mak ami bele halo apoiu emerjénsia, maibé tanba iha hela prosesu aprovizionamentu normalmente sei fó kompeténsia tomak ba empreza ne’ebé sai manán-na’in ba projetu refere,” nia esplika.
Entretantu, antes ne’e, Ministru Obra Públika Samuel Marçal hateten nia parte sei orienta Institutu Jestaun Ekipamentus Apoiu Dezenvolvimentu Infraestrutura (IGEADI) normaliza temporária ka halo empreza ida maa hadia estrada protokolu iha Manatutu Laleia ne’ebé ameasa atu kotu.
“Depois mak orienta Institutu Jestaun Ekipamentus (IJE) halo normalizasaun temporária ka empreza ida tanba presiza duni halo reabilitasaun, entaun tenke hasai tiha rai. Tékniku sira presiza haree tanba dalaruma rai mamar impaktu bee husi okos, entaun tenke halo estudu kle’an para hadi’a totalmente,” nia dehan.
Nia informa, husi parte laboratóriu presiza haree lai problema ida-ne’e tanba MOP la’ós hadi’a para transporte bele asesu de’it maibé gasta osan ho obra ne’ebé kualidade no dura to’o tempu naruk.
“Entaun problema ne’e bele mós haree empreza balun ne’ebé besik iha área ne’ebá bele orienta sira hadi’a obra ne’e, maibé tanba ekipa sei halo levantamentu dadus hodi identifika loloos katak estrada ne’e bele halo atuasaun temporária ka lae,” nia afirma.
Aleinde ne’e, nia hatutan, kondisaun estarada atu kotu mos akontese iha parte Bukoli (Baukau) nian ne’ebé monu beibeik ne’e, nia orienta ona ekipa tékniku hodi ba halo levantamentu dadus no normaliza termporária atu trabsporte bele halo movimentu.
Jornalista : Alexandra da Costa
Editór : Cancio Ximenes
