DILI, 19 Janeiru 2026 (TATOLI)-Centro Nacional Chega! Institutu Públiku (CNC, I.P) sei konstrui uma ida de’it ba sobrevivente na’in-ida, tanba hetan redusaun iha Orsamentu Jerál Estadu (OJE) 2026.
Diretór-Ezekutivu CNC, I.P, Hugo Maria Fernandes, hateten iha tinan 2025 CNC halo uma neen ba sobrevivente sira no entrega ikus iha munisipiu Baukau, iha dezembru tinan kotuk.
“Triste oituan ho redusaun orsamentu ne’e, tanba ita labele apoiu uma barak ba ita-nia sobrevivente sira. Entaun, ita aloka osan ba uma ida nian de’it, ho totál orsamentu $17.028. Ita tenke haree didiak, nune’e entre sobrevivente sira ne’e ida ne’ebé mak presiza liu ita apoia”, dehan.
CNC iha tinan ne’e halo uma ida, maibé sei buka esforsu atu ko’alia ho liña ministeriál ne’ebé trata kona-ba asuntu abitasaun karik iha osan CNC bele submete lista naran sobrevivente nian ba sira hodi harii uma ba sira.
CNC implementa programa Uma Memória Esperansa husi tinan 2021 to’o 2024, ne’ebé to’o agora halo ona uma hamutuk 20-resin hodi disponibiliza ba vítima funu. Uma sira ne’e harii iha munisípiu hotu, falta Manatutu no Ermera.
Kada uma ho medida metru 7×9, kompostu husi kuartu tolu, hariis-fatin iha laran, sala vizita no dapur iha li’ur.
Notisía relevante: CNC, I.P finaliza ona Uma Memória Esperansa neen ba sobrevivente sira
Jornalista: Arminda Fonseca
Editora: Maria Auxiliadora
