DILI, 19 Janeiru 2026 (TATOLI)-Centro Nacional Chega! Institutu Públiku (CNC, I.P) arrekada reseita $19.205,75 ba kofre Estadu iha 2025, liuhusi atividade haat.
Diretór-Ezekutivu CNC, I.P, Hugo Maria Fernandes, hateten CNC nia meta atu rekolla reseita iha tinan kotuk hamutuk rihun $8, maibé liu alvu ne’ebé fó hamutuk rihun $19-resin.
“Reseita ne’ebé ita rekolla mai husi atividade haat CNC nian, hanesan Chega Shop ka Gallery $4.471,5 Chega historical tourism $6.279.25 no Chega rental services $8.020, no venda dokumentu rihun $435”, Hugo Maria Fernandes informa Tatoli Balide.
Nia hateten katak reseita CNC kontinua sa’e, tanba mídia sira mós kontribui halo publikasaun kona-ba atividade CNC nian, nune’e atrai vizitante sira.
Tuir nia, kada tinan, CNC la’ós simu de’it Orsamentu Jerál Estadu hodi ezekuta, maibé mós arrekada reseita ba Estadu tuir alvu ne’ebé iha.
Orsamentu Jerál Estadu ne’ebé aloka ba CNC iha 2025 hamutuk millaun $1,5 no ezekuta to’o 31 Dezembru hamutuk 92%.
Jornalista: Arminda Fonseca
Editora: Maria Auxiliadora
