DILI, 19 Janeiru 2026 (TATOLI)—Sekretária Estadu Formasaun Profisionál no Empregu (SEFOPE) hamutuk ho empreza Tsuneishi fó teste ba kandidatu traballadór timoroan na’in-48 iha área konstrusaun soldadura, pinta no fishing liuhusi Programa Mobilidade Traballadór Japaun (PMLJ).
Atividade ne’e hala’o iha Sentru Nasionál Empregu no Formasaun Profissionál (CNEFP) Tibar, no ramata ho entrevista kandidatu traballador sira hamutuk ho empreza Tsuneishi husi Japaun.
Assesór ba Estratéjia Nasionál ba Empregu, Ilidio Ximenes da Costa, hateten katak empreza Tsuneishi planeia rekruta de’it kandidatu na’in-10 husi Timor-Leste liu husi teste ne’e.
“Ha’u rekomenda atu Governu bele fornese materiál no ekipamentu di’ak-liu iha futuru, atu partisipante sira bele prátika di’ak liu. Maibé ba abilidade soldadura nian, partisipante sira ona iha abilidade, tanba iha Sentru Formasaun Tibar, partisipante sira hetan fasilidade kompletu tanba apoiu husi KOICA,” Assesór ba Estratéjia Nasionál ba Empregu, Ilidio Ximenes da Costa, hateten ba Agência Tatoli liuhusi telefonika, ohin.
Atividade ne’e parte ida husi ezersísiu atu hasae kapasidade traballador Timor-Leste nian no alarga oportunidade servisu iha rai-li’ur liuliu iha Japaun, liuhusi programa kooperasaun formasaun no mobilidade traballadór profissionál.
Kandidatu traballadór sira-ne’ebé hetan teste mai husi sentru formasaun tolu mak hanesan CNEFP-Tibar, Senai Becora no Dom Bosco Komoro.
“Tanba ne’e, ho laran haksolok tebes heree no observa diretamente teste Soldadura (welding) no Pinta (Painting) no Piping ne’ebé hala’o husi Empreza Tsuneishi Shipbuilding husi Japaun ba Joven sira iha Sentru Formasaun Tibar,” nia dehan.
Entretanth teste ne’e akompania direta husi Konsellu Estratéjia Empregu Nasionál, Dirijente Nasionál Empregu li’ur nian (DNEE) no ekipu Japaun husi PMLJ.
Jornalista : Alexandra da Costa
Editór : Cancio Ximenes
