KOVALIMA, 19 Janeiru 2026 (TATOLI)–Sekretáriu Munipál Administrasaun Finansa (SMAF) Kovalima, Alberto Moniz de Araújo klarifika katak Autoridade munisípiu sei imprime manuál lalaok ezekusaun Orsamentu Jerál Estadu (OJE) 2026, nune’e ofisiál finansa suku sira bele ezekuta tuir regra ezekusaun.
“Ministériu Finansa mós imprime ona atu distribui ba ita-boot sira no aproveita mós imprime regra ezekusaun, nune’e ita boot sira bele lori hanesan bukae ida hodi fó ba finansa suku, nune’e sira bele tuir regra ezekusaun OJE”, Sekretáriu Munisipál Administrasaun Finansa (SMAF) hato’o iha Salaun AMC, ohin.
Bazeia legál ezekusaun Orsamentu Jerál Estadu (OJE) 2026 haktuir iha Lei númeru 3/2025, 23 Abríl kona-bá enkuadramentu Orsamentu Jerál Estadu jestaun finanseira públika,Dekretu-Lei númeru 42/2025, 15 Dezembru no Dekretu Lei númeru 41/2025 , 15 Dezembru.
Iha fatin hanesan, Prezidente Autoridade Munisípiu Kovalima (PAM), Miguel Armada Cardoso husu ba diretór servisu munisipál sira iha Kovalima atu domina lalaok ezekusaun Orsamentu Jerál Estadu (OJE) 2026.
“Domina lalaok ezekusaun orsamentu ne’e importante loos, nune’e bele hatene imi nia osan atu ba ne’ebé. Fó hanoin atu diretór servisu munisipál sira presiza atu komprende didiak ezekusaun orsamentu, se la’e ezekusaun OJE labele atinje nia meta”, dehan PAM Kovalima ne’e.
Ezekusaun OJE atu atinje nia meta diretór servisu munisipál sira presiza entende siklu OJE bainhira uza orsamentu iha rúblika bens no servisu presiza submete pedidu hodi hetan aprovasaun husi PAM , hafoin hatun despaixu ba servisu munisipál Finansa hodi halo prosesu.
Entretantu, Xefe Suku Fohorem, Postu Administrativu Fohorem, Julio Ferreira Alves , dehan presiza distribui manuál lalaok ezekusaun OJE 2026 ba finansa suku sira, nune’e labele utiliza sala orsamentu Estadu.
“Kona-ba regra ezekusaun OJE, ha’u hanoin ami nia preokupasaun presiza distribui lalaok ezekusaun OJE ba finansa iha suku sira bele intende, nune’e ezekusaun OJE labele sala ”, Xefe Suku Fohorem Julio Ferreira Alves hato’o iha Salaun AMC.
Jornalista: Celestina Teles
Editór: Florencio Miranda Ximenes
