DILI, 19 Janeiru 2026 (TATOLI)—Diretora Nasionál Teknolojia no Informasaun Sekretaridu Tékniku Administrasaun Eleitorál (STAE), Tulia de Andrade informa to’o ohin loron STAE introdús ona kartaun biométriku ba eleitór sira iha territóriu hamutuk 309.913.
“Dezde STAE introdús kartaun biométriku iha Jullu 2024 kontinua iha 2025 depoiz ita suspende tiha atividade resenseamentu eleitorál iha 22 Dezembru iha 2025, no ofisializa fali ba 12 Janeiru 2026 ne’e. To’o ohin ne’e ita resénsia ona ba biométriku hamutuk 309.913,” Tulia de Andrade ba TATOLI iha nia kna’ar fatin, Kaikoli, Segunda ne’e.
Tulia esplika ida-ne’e kompostu hosi rejistu atualizadu 34.420 no resénsia foun ba biométriku hamutuk 275.493.
Eleitór ne’ebé resénsia ona ba kartaun biométriku kada munisípiu mak hosi Aileu iha 17.305, Ainaru iha 19.031, Ataúru iha 3.914, Baukau iha 38.472, Bobonaru iha 23.623, Kovalima iha 18.840, Dili iha 78.075, Ermera iha 18.322, Lautein iha 21.179, Likisá iha 17.104, Manatutu iha 19.308, Manufahi iha 3.863, Oekusi iha 14.158 no Vikeke iha 16.719.
“Hanesan ita hotu hatene iha inísiu kuandu ita introdús resenseamentu biométriku no aumezmu tempu STAE mós adapta situasaun reál ne’ebé liga infraestrutura entaun fatór importante mak liña internet. Dalaruma udan hanesan ne’e liña internet monu maibé STAE hala’o ona durante tinan rua entaun ami hatene ona halo jestaun oinsá. Entaun saida mak ami halo mak ami iha ligasaun ho fornesedór liña telekomunikasaun ne’ebé kuandu liña internet monu automatikamente sira responde. Prosesu halo kartaun biométriku ne’ebé tarde mak semana ida,” Tulia dehan.
Kona-ba estoke biométriku, nia dehan, neste momentu estoke sei bele responde hela tanba daudaun ne’e STAE mós halo ona akizisaun ba kartaun biométriku, maibé ida-ne’e bele atende hela ba eleitór sira.
Entretantu, Tulia informa, atendimentu movel ne’e STAE sei halo permanénsia iha Abríl to’o Dezembru tinan ne’e iha postu hotu-hotu nune’e halo preparasaun ba tinan letivu 2027 ba eleisaun prezidensiál nian.
Jornalista: Osória Marques
Editór: Xisto Freitas da Piedade
