DILI, 20 Janeiru 2026 (TATOLI)—Diretór Servisu Saúde Munisípiu Dili, Mateus Pinto, informa iha Servisu Saúde Munisípiu Dili hato’o ona pedidu ba Ministériu Saúde husu ai-moruk Abate ne’ebé stock out kuaze fulan tolu ona, maibé Ministériu Saúde seidak fó resposta.
“Ha’u bele dehan ai-moruk Abate to’o agora nasionál stock out, tanba ida-ne’e mak momentu ami hala’o enkontru ho autoridade lokál sira, sira mós lamenta tanba saida mak to’o agora stock out. Maske ami hato’o tiha ona, maibé seidauk iha resposta,” Mateus Pinto hateten ba jornalista sira iha nia kna’ar fatin, Formosa, ohin.
Nia hateten, kona ba ai-moruk abatizasaun ne’e bele fasilita komunidade hodi hamenus númeru susuk dengue liuliu ba iha hariis fatin iha uma laran.
“Preokupasaun sira-ne’e mai husi líder Komunitária sira ne’e, ami hato’o ona ba Ministériu Saúde liuhusi Vise Ministru Saúde Asuntu Fortalesementu Institusionál Saúde, Jose Dos Reis Magno, nia Gabinete maibé to’o agora sidauk iha resposta. Iha ne’e, ha’u hakakarak hato’o lamentasaun sira-ne’e, entaun karta ida-ne’e mós ha’u hato’o ona ba Vise Minstru Saúde asuntu fortalesementu,” nia dehan.
Nia informa, kontiudu karta ne’e atu husu se bele orienta oinsá hodi a-imoruk Abate ne’e atu bele distribui, se bele hare’e to’ok orsamentu ruma nune’e bele buka dalan.
“Ai-moruk Abate ne’e, durante ne’e kompra husi Institutu Nasionál Farmásia Produtu Médikamentu ka lae, maibe ha’u hatene ai-moruk ne’e sosa husi ne’ebé. Maibé, iha de’it informasaun katak iha empreza lokal ida mak sosa, maibé lahatene empreza ne’e sé nian no iha ne’ebé. Ha’u mós ladún hatene, ai-moruk ne’e mai husi ne’ebe, ida ne’e so nasionál mak hatene,” nia esplika.
Nia dehan, estoke ai-moruk prefere mamuk kuaze fulan tolu atu ba haat ona, tanba distribuisaun Abati ba komunidade rasik la hala’o ona dezde fulan-Outubru tinan 2025.
“Tanba dezde Outubru kedas ita la fahe Abati, maibé agora iha Sentru Saúde balun sei fahe ne’e iha balun mak sei iha ne’e estoke tuan nian, tinan hira ba kotuk nian mak sira balun rai no fahe ba aldeia afetadu sira, maibé estoke iha nasionál to’o agora laiha,” nia hateten.
Jornalista : Felicidade Ximenes
Editór : Cancio Ximenes
