DILI, 20 Janeiru 2026 (TATOLI)–Anin no udan-boot ne’ebé akontese iha Munisípiu Baukau, Segunda (19/01), halo ai-tohar hodi rezulta feto ho naran Natácia Belo “Jessy” (23) lakon vida iha Aldeia Lutumutu, Suku Tirilolo, Postu Administrativu Baukau Vila.
Tuir kronolojia, vítima fase roupa iha dadeersan maibé derepente ai-kafé hun tohar hanehan vítima, mezmu evakuada ba Ospitál Rejionál Eduardo Ximenes maibé la konsege salva vida.
“Ai-hun monu direta iha-nia leten habiit nia ulun, entaun viziñu sira-ne’ebé haree koko salva hodi hasees ai ne’ebé hanehan vítima no lori halai ba ospitál maibé la konsege salva,” Xefe Suku Tirilolo, Elvino Belo informa ba TATOLI liuhusi telefónema, Tersa ne’e.
Elvino relata, ai-tohar akontese iha tuku 10.00, kauza husi anin no udan durante kalan tomak ho intensidade boot.
“Tuir médiku katak vítima nia ulun mak rahun tanba ne’e labele salva,” Elvino konta.
Entretantu, vítima nia estatutu nu’udár kazada, husik hela oan mane ida. Tuir oráriu, aban (21/01), sei haloot vítima iha fatin deskansa ikus nian (semitériu).
Jornalista: Natalino Belo
Editór: Xisto Freitas da Piedade
