DILI, 20 Janeiru 2026 (TATOLI)–Autoridade Munisipál Baukau (AMB) simu apoiu tratór rua inklui ekipamentu mákina ko’a no kuda hare husi Ministériu Agrikultura, Pekuária, Peská no Floresta (MAPPF).
Ministru Agrikultura, Pekuária, Peská no Floresta, Marcos da Cruz esplika apoiu materiál agríkola hirak-ne’e nu’udár kompromisu Governu iha-ne’ebé tuir polítika MAPPF ho objetivu atu krexe númeru produsaun nune’e Timor-Leste bele iha auto-sufisiénsia ba ai-han.
“Ita hakarak mákina sira-ne’e uza ho di’ak. Se bele ita halo natar dala rua iha kada tinan. Bainhira bee menus ona kuda fali modo. Ita hakarak serbisu beibeik serbí ita-nia nasaun,” Ministru Marcos da Cruz hato’o mensajen ne’e iha arredór Administrasaun Munisipál Baukau, Tersa ne’e.
Aleinde ne’e, nia dehan, Governu nia apoiu ekipamentu hirak-ne’e parte husi moderniza sistema agrikultura hanesan liuhusi konstrusaun irrigasaun sira-ne’ebé balun finaliza ona no balun kontinua iha faze konstrusaun.
“Tenke moderniza hodi ajuda ita-nia agrikultór sira iha natar no toos,” Marcos da Cruz hateten.
Governante ne’e relata tratór ne’ebé iha kompleta ona ho atraladu atu ajuda tula sai hare bainhira tempu kolleta, enkuantu mákina kuda hare sei ajuda komunidade nia tempu tanba prosesu kuda hare nu’udár serbisu todan ida-ne’ebé agrikultór sira enfrenta.
Nia hatutan mákina ko’a hare iha funsaun kombina serbisu tolu hanesan ko’a, dulas no enxe rasik hare kulit ba karón laran ho kondisaun moos.
Iha fatin hanesan, Prezidente Autoridade Munisípiu Baukau (AMB), Veneranda Lemos hato’o agradese ba Governu liuhusi MAPPF ne’ebé apoia ona ekipamentu agrikultura, tan ne’e AMB kompromete sei utiliza no kuidadu nune’e bele iha rezultadu liuliu hasa’e produsaun iha Baukau.
“Ita simu mákina sira-ne’e bainhira ita halo produsaun, ida-ne’e mak ita agradese,” Veneranda Lemos informa.
Entretantu, MAPPF apoiu ekipamentu agrikultura hanesan tratór ho marka Kubota boot rua kompleta ho fasilidade hanesan sarua ida, rotáriu rua no atraladu ida. Apoia seluk mak mákina kuda hare hamutuk unidade 12 no makina ko’a hare hamutuk unidade lima.
Jornalista: Natalino Belo
Editór: Xisto Freitas da Piedade
