Funsionáriu públiku 67 ne’ebé hakna’ar-an iha ANATL sei fila-fali ba MTK
DILI, 20 Janeiru 2026 (TATOLI)—Prezidente Administrasaun Aeroportu no Navegasaun Aérea Timor-Leste, Romualdo António Soares, informa funsionáriu públiku na’in-67 ne’ebé hetan lisensa vensimentu husi ministériu hodi hakna’ar-an iha ANATL sei fila-fali ba Ministériu Transporte Komunikasaun (MTK) iha fulan-Janeiru no Outobru 2026.
Nia hatutan, prinsipalmente iha funsionáriu lisensa vensimentu husi funsionáriu públiku ne’ebé destaka servisu iha ANATL, tinan ne’e sei iha no ANATL simu ona karta husi Ministériu Transporte Komunikasaun (MTK) ne’ebé fulan ida-rua tan funsionáriu balun sei fila no balun sei adianta to’o fulan-Outobru.
“Ami sira ne’e funsionáriu públiku ne’ebé orijen husi Ministeriál no hetan lisensa espesiál ka sein-vensimentu, maibé servisu ne’e bainhira Ministeriál ezije ona ami atu fila, prontu ami tenke fila tanba saláriu sei prevee hela husi ministériu,” nia hateten ba Agência Tatoli iha nia kna’ar fatin, Komoro, ohin.
Ida-ne’e mak ANATL hahú prepara ona ninia funsionáriu própriu ne’ebé tinan kotuk halo rekrutamentu no haruka ona sira ba tuir formasaun iha teória ka formasaun báziku iha Indonézia durante semana rua, no fulan ida-ne’e nia laran instrutór sira husi Politéknik Curuk Jakarta sei mai halo fali formasaun prátika.
“Ami sei haree tan orsamentu dalaruma tinan ida-ne’e ami sei haruka tan sira ne’ebé seidauk ba tuir formasaun báziku hodi asegura sira-nia servisu operasionál tuir padraun ICAO no tuir rekezitu ne’ebé AACTL fó ba ANATL,” nia dehan.
Entretantu, totál funsionáriu públiku ne’ebé lisensa vensimentu husi ministeriál hamutuk na’in-67 no funsionáriu própriu ne’ebé foin halo rekrutamentu hamutuk ema na’in-155.
Jornalista : Alexandra da Costa
Editór : Cancio Ximenes
