DILI, 20 Janeiru 2026 (TATOLI)–Governu Timor-Leste liuhusi Ministériu Negósiu Estranjeiru no Kooperasaun (MNEK) no Ministériu Justisa (MJ), tersa ne’e, entrega rai no edifisiu ba Governu Laos hodi estabelese sira-nia Embaixada iha Faról, Dili, Timor-Leste.
“Ita realiza serimónia ida-ne’e hodi entrega propriedade rai no edifisiu ba Governu Laos atu sira bele estabelese sira-nia Embaxada iha ne’e,” Vise-Ministra Asuntu ASEAN, Milena Rangel, hateten ba jornalista sira hafoin ramata serimónia ne’e.
Nia dehan, meiu ne’e hanesan troka ida entre Governu nasaun rua (2) tanba iha tinan 2012 Governu Laos entrega ona rai no edifisiu ba Governu Timor-Leste hodi estabelese Embaixada Timor-Leste nian no dadaun ne’e Timor-Leste entrega hikas rai no edifisiu ba Laos.
“Entrega ba malu edifisiu no rai ne’e mai ho modalidade ida resipropriedade, ita troka, sira mós fó sira nia fatin mai ita, iha ne’e mós ita fó ita nian ba sira. Ita hakarak atu asegura liutan relasaun diplomata ho Laos, relasaun entre povu ho povu la’ós de’it hanesan nasaun membru ASEAN maibé kooperasaun bilaterál ne’ebé ita estabelese ho Laos desde inisiu kedan bainhira ita Restaura ita-nia independénsia,” Milena dehan.
Iha sorin seluk, Vise-Ministra Negósiu Estranjeiru no Kooperasaun Laos, Phongsamouth Anlavan, hato’o agradesementu ba Governu Timor-Leste ne’ebé mak atribui ona rai no edifisiu ba Governu Laos hodi estabelese Embaixada iha nasaun ne’e.
“Agradese tebes ba Governu Timor-Leste ne’ebé oferese ona rai no edifisiu mai ami. Ita sei servisu hamutuk nafatin ba oin hodi hametin ita-nia kooperasaun bilaterál no hanesan membru ASEAN ita sei tulun malu nafatin,” Vise-Ministra ne’e hateten.
Nia afirma, nasaun rua ne’e nia kooperasaun bilaterál metin hahú kedan Timor-Leste restaura nia independénsia iha tinan 2002, no agora Timor-Leste tama ona hanesan membru ASEAN mak relasaun sei metin liután hodi tulun malu iha área oioin.
Iha fatin hanesan, Ministru Justisa, Sergio Hornai, hateten nu’udar Ministériu ne’ebé responsabiliza ba rai no propriedade hotu iha nasaun ne’e, koordena ho MNEK hodi oferese edifisiu no rai ba Laos hanesan respeitu ida-ne’ebé Timor-Leste halo ba Laos hodi hala’o misaun diplomata iha Timor-Leste.
“Rai no edifisiu ne’ebé oferese ba Governu Laos atu estabelese Embaixada iha ne’e, hanesan respeita mutua kooperasaun ho nasaun irmaun Laos no Timor-Leste, Lori Governu nia naran, liuliu Ministériu Justisa hakarak agradese ba kooperasaun sira hotu ne’ebé ita halo ona,” Sergio hateten.
Iha okaziaun ne’e, Ministru Sergio hato’o agradesementu ba Laos no nasaun membru hotu ne’ebé fó apoiu másimu ba Timor-Leste nia adezaun no ikus Timor-Leste sai ona hanesan nasaun membru plenu ASEAN.
Serimónia entrega rai no edifisiu ne’e Governu Timor-Leste reprezenta Ministru Justisa, Sergio Hornai, no Vise-Ministra Asuntu ASEAN hodi entrega direta ba Vise Ministra Negósiu Estranjeiru no Kooperasaun Laos, Phongsamouth Anlavan.
Timor-Leste no Repúblika Demokrátika Populár Laos mantein relasaun diplomátika formál dezde fulan-Jullu tinan 2002. Nu’udar parte ida atu hametin parseria rejionál, Timor-Leste inaugura ninia Embaixada rezidente iha Vientiane iha fulan-Jullu tinan 2014, hodi reflete kompromisu ho hakle’an relasaun bilaterál no kooperasaun iha kontestu ASEAN.
Nasaun membru ASEAN hotu tenke iha Embaixada
Vise-Ministra Asuntu ASEAN, Milena Rangel, hatutan harii Embaixada entre nasaun membru ASEAN hotu hanesan rekezitu ida tanba nasaun membru hotu kada nasaun tenke iha Embaixada.
“Harii Embaixada kada nasaun membru ASEAN ida-ne’e hola parte mós hanesan prátika normál ida, membru ASEAN hotu tenke iha sira-nia Embaxada iha Estadu membru sira seluk,” nia dehan.
Tanba ne’e, Timor-Leste konsege estabelese hotu ona nia Embaixada iha nasaun membru 10 seluk hanesan Indonézia, Laos, Vietname, Tailándia, Singapura, Filipina, Myanmar, Kamboja, Malázia no Brunei Darusalam.
“Estadu membru hotu ne’e só nasaun rua mak sira-nia Embaixada seidauk estabelese iha ita-nia nasaun hanesan Vietname no Myanmar, maibé la kleur tan sira sei loke mós sira-nia Embaixada iha ne’e, komunikasaun la’o hela,” nia dehan.
Jornalista : Hortencio Sanchez
Editór : Cancio Ximenes
