DILI, 20 Janeiru 2026 (TATOLI)—Ministru Ensinu Superiór, Siénsia no Kultura (MESSK), José Honório da Costa Pereira Jerónimo hateten ministériu kontinua halo revizaun ba kurríkulu padraun nasionál hodi sai kurríkulu nasionál ida-ne’ebé garante kualidade Institutu Ensinu Superiór (IES), nune’e universidade hotu-hotu tenke hanorin lian portugés.
“Tanba ne’e, Ministériu Ensinu Superiór iha profesor na’in-ualu (8) ne’ebé kontinua hanorin língua portugeza ba profesór iha universidade privada sira atu promove nafatin língua portugeza hodi garante kualidade iha institutu ensinu superiór sira iha Timor-Leste,” nia dehan ba jornalista sira iha resintu Universidade Nasionál Timor Lorosa’e (UNTL), Tersa ne’e.
Ministru José Jerónimo hatutan ministériu mós kada tinan haruka profesór sira bá estuda iha Brazíl no Portugál hodi hasai mestradu atu kontinua promove língua portugeza.
Ministru José Honório subliña daudaun ne’e fakuldade direitu UNTL hanorin tiha ona ho língua portugeza no mós universidade privadu hanesan UCT (Universidade Católica Timorense) no São João Brito sira-nia prosesu aprendizajen ho portugés.
“Hosi ida-ne’e mak ha’u hanoin ema hotu hakarak ona aprende lian portugés, tanba ita hakarak ida-ne’e sai ona kurríkulu nasionál,” nia tenik.
Nia esplika labele hanorin ho lian Indonézia tanba la’ós língua ofisiál Timor-Leste.
“Ba futuru ita sei haree ida-ne’e, tanba lian Indonézia no Inglés hanesan língua traballu. Ne’e duni ha’u hanoin sira labele hanorin ho língua Indonézia,” nia subliña.
Nia haktuir atu solusiona problema ne’e ministériu kada tinan haruka profesór sira ba Portugál ho Brazíl hodi kontiua aprende.
“Ba tinan ne’e ita sei haruka profesór na’in-30 ba Brazíl no Portugál, liuliu profesór sira-ne’ebé hanorin portugés no atinje ona nivel 2,” nia akresenta.
Jornalista: Osória Marques
Editór: Xisto Freitas da Piedade
