VIKEKE, 20 Janeiru 2026 (TATOLI)–Xefe Sentru Saúde Postu Administrativu Lakluta, Munisípiu Vikeke, Bendito Soares informa Sentru Saúde Lakluta daudaun ne’e menus rekursu médiku hodi halo atendimentu ba populasaun iha Postu administrativu Lakluta.
“Ami menus liu mak mediku tanba ami-nia mediku ne’ebé koloka iha Postu Lakluta na’in-rua (2) de’it, entaun postu saúde sira-ne’e laiha médiku hodi halo atendimentu ba ita-nia populasaun ne’ebé mai trata sira-nia moras,” Bendito Soares ba TATOLI iha Postu Lakluta, Tersa ne’e.
Tuir Xefe Sentru Saúde katak menus pesoál saúde iha área médiku sai hanesan dezafiu ida tanba moras merénsia sira mai atu halo diagnóstika ruma susar.
“Ida-ne’e sai hanesan problema ba ami. Bazeia ba polítika Ministériu Saúde loloos ne’e presiza tan médiku hamutuk na’in-lima nune’e ami bele koloka ba postu saúde sira hodi atende populasaun,” nia hato’o.
Bendito haktuir preokupasaun sira-ne’e relata hotu ona ba Servisu Saúde Munisípiu Vikeke, maibé seidauk iha resposta ba preokupasaun ne’ebé sentru saúde enfrenta.
Tuir dadus, pesoál saúde iha Sentru Saúde Lakluta hamutuk na’in-46 ne’ebé kompostu husi médiku, enfermajen, parteira, analista, saúde ambientál, nutrisaun, seguransa ne’ebé daudaun ne’e ativu servisu iha Sentru Saúde Lakluta no postu saúde sira.
Hatán ba preokupasaun ne’e, Diretór Servisu Saúde Munisípiu Vikeke, Aljaksono Soares Maia haktuir agora rekruta hela pesoál saúde ba área médiku hamutuk na’in-tolu (3), tan ne’e bainhira prosesu rekrutamentu hotu sei koloka médiku ida ba Postu Lakluta hodi atende populasaun.
Jornalista: Vitorino Lopes da Costa
Editór: Xisto Freitas da Piedade
