DILI, 20 Janeiru 2026 (TATOLI)–Vise-Ministra Asuntu ASEAN, Milena Rangel, hateten Timor-Leste ho Laos daudaun ne’e livre ona vistu tanba Governu nasaun rua asina ona akordu iha tinan 2024.
“Iha tinan rua (2) liuba kuandu Laos mak prezide hela ASEAN nu’udar uma-na’in iha altura ne’ebá, iha simeira, ita mós asina ona akordu ida-ne’ebé kona-ba livre vistu. Agora ba nasaun rua (2) ne’e livre vistu viajen ba Pasaporte tipu tolu ne’e hotu mak diplomata, serbisu no komun,” Milena hateten ba jornalista sira iha, Faról, ohin.
Tanba ne’e, nia hateten, povu husi nasaun rua halo viajen ba mai livre no la selu tan vistu hanesan tinan sira ba kotuk.
Aleinde ne’e, Timor-Leste ho Laos mós iha akordu kona-ba ekonomia nian maibé sei iha prosesu diskusaun.
“Laos hanesan nasaun ida mós tama ikus iha ASEAN, sira tama iha tinan 1997, sira tinan 30 ona sai membru ASEAN, entaun ita aprende buat barak husi sira. Sira mai partilla sira nia esperiénsia oinsá mak sira-nia prosesu integrasaun rejionál no ita aprende buat barak husi sira. Iha akordu kona-ba ekonomia nian, ita sei haree, ba oin atu akomula saida-saida mak iha laran,” nia dehan.
Kona-ba kondisaun nasaun Timor-Leste ho Laos la dook malu tanba nasaun referidu ho nia medida kiiko’an no sei tama hela kategoria hanesan nasaun menus dezenvolvidu hanesan mós Timor-Leste ho nune’e nasaun rua (2) presiza troka idea ba malu.
Jornalista : Hortencio Sanchez
Editór : Cancio Ximenes
