DILI, 20 Janeiru 2026 (TATOLI) – Diresaun Nasionál Transporte Terrestre (DNTT) rejista veíkulu ne’ebé tama no sai iha pontu entrada Batugadé, munisípiu Bobonaru, no Salele munisípiu Kovalima, iha tinan 2025, hamutuk 25.909.
Xefe Departamentu Sekretariadu Apoiu Tékniku Administrativu DNTT, Nelson Sequeira, hateten veíkulu tama iha Batugadé 13.981 no sai hamutuk 11.827, no iha Salele tama hamutuk 101.
“Bainhira DNTT serbisu hamutuk ho Alfándega estabelese sistema Asycuda ne’e ajuda tebes ita, tanba fásil liu kontrola karreta tama Timor-Leste. Nune’e, karreta ne’e la mai mós bele hatene ninia paradeiru ne’e bá ne’ebé”, Nelson Sequeira dehan ba Tatoli.
Nia dehan dadus ne’ebé rekolla ne’e esetu Oekusi, tanba seidauk estabelese sistema Asycuda. Tuir informasaun, Alfándega mós fó ona formasaun ba funsionáriu sira no sujere bele utiliza sistema Asycuda iha fronteira Oekusi.
Movimentu veíkulu tama-sai iha fronteira iha kada tinan ne’e sa’e iha fulan-Dezembru, tanba timoroan barak mak ultrapasa bá Indonézia.
“Husi movimentu ne’ebé sai husi Timor-Leste bá Indonézia kontribui reseita hamutuk $76.400. Ida-ne’e hahú husi Janeiru to’o Dezembru 2025. Maibé, reseita ne’ebé mai husi veíkulu tama Timor-Leste hahú husi Juñu to’o Dezembru 2025 hamutuk $198.195”, dehan.
Notisía relevante: Governu aplika taxa oin rua ba veíkulu merkadoria ne’ebé tama iha Batugadé
Jornalista: Arminda Fonseca
Editora: Maria Auxiliadora
