DILI, 21 Janeiru 2026 (TATOLI)–Prezidente Autoridade Protesaun Sivíl (APC, sigla portugés), Jesuíno dos Reis Matos Carvalho, hateten iha instituisaun ne’ebé nia lidera sei la hapara funisionariu ida tanba instituisaun referidu presiza rekursu atu hala’o serbisu.
“Iha instituisaun barak mak tenke hapara funsionáriu sira, maibé iha APC ha’u mantein nafatin funsionáriu hotu, tanba ami presiza ema atu halo serbisu. Ami-nia rekursu husi munisípiu to’o nasionál ami presiza tebes. Iha instituisaun balun dehan fatin tuur la to’o, iha ami-nian fatin la to’o duni, maibé am- nia serbisu mak presiza duni ema atu halo serbisu,” Jesuíno hateten ba jornalista sira iha edifisiu APC, Kaikoli, ohin.
Nia dehan, hahú horisehik to’o ohin APC nia funsionáriu hotu selebra ona kontratu no kontinua serbisu hanesan baibain hodi proteje komunidade iha área risku ba dezastre.
“Ami-nia serbisu ne’e todan uitoan, entaun presiza ema. Dalaruma ami apoiu emerjénsia tenke to’o kalan boot, ha’u rasik tun ho pesoál Bombeiru sira kombate inséndiu to’o kalan boot. Dalaruma, iha loron boot, ema hotu kontente ho família, ami ba iha tasi ibun sira hodi kontrola komunidade bainhira hetan dezastre ami tenke halo kedan atuasaun,” nia dehan.
Tanba ne’e, iha kinta (22 Janeiru), lideransa hotu ne’ebé tutela iha Ministériu Interiór sei hala’o enkontru ho Ministru Interór, Francisco Guterres, hodi rezolve fallansu hirak ne’ebé mosu ba instituisaun ida-idak durante ne’e.
“Aban ami sei enkontru ho Ministru Interiór, atu haree fallansu sira hotu liuliu APC ami atu simu orientasaun. Maibé iha ne’e bele oinsá mós ami sei la hasai ema, pesoál iha ne’e ha’u hakarak mantein nafatin tuir loloos atu rekruta tan ba Bombeiru no Unidade Espesiál, tanba ami-nia fó atendimentu ba komunidade ne’e importante tebes,” nia dehan.
Tuir dadus ne’ebé iha, totál funsionariu iha APC kuaze ema 1000-resin ne’ebé kompostu husi permanente, ajente no kazuál.
“Númeru ne’ebé iha ami sente seidauk to’o tanba munisípiu limite tebes. Bainhira akontese buat ruma, sira halai ba mai la to’o, maibé iha nasionál ami sempre jere oinsá bele halo atendimentu ho di’ak,” nia dehan.
Jornalista : Hortencio Sanchez
Editór : Cancio Ximenes
