APC rekomenda MTK orienta motorista transporte públiku tuir formasaun kombate inséndiu
DILI, 21 Janeiru 2026 (TATOLI)– Prezidente Autoridade Protesaun Sivíl (APC, sigla portugés), Jesuíno dos Reis Matos Carvalho, rekomenda ba Ministériu Transporte Komunikasaun (MTK) atu orienta motorista transporte públiku sira tuir formasaun iha APC kona-ba oinsá kombate inséndiu ka ahi haan karreta derrepente.
“Ha’u husu ba MTK sé bele ita tau ona protesaun ba ema-nia vida, transporte públiku sira hanesan Taxi no Mikrolete, Angguna, Bus sira-ne’ebé tula pasajeiru, se bele mai ami fó formasaun ba sira, oinsa kombate ahi han karreta derepenta ne’e. Labele hein de’it Bombeiru, nu’udar motorista, nia tenke hatene halo salvamentu ba nia vida no ema hirak ne’ebé nia tula ne’e nia vida,” Jesuíno hateten ba jornalista sira iha edifisiu APC, Kaikoli, kuarta ne’e.
Nia dehan, bainhira motorista sira la tuir formasaun mak sei la hatene bainhira ahi han karreta derrepente de’it.
“Motorista sira presiza iha formasaun, ida-ne’e importante. Ida mós mak ne’e, nia lori karreta, nia fuma sigaru, ida-ne’e risku maka’as tebes. Karreta ne’e utiliza gazolina, loron tomak ó halo movimentasaun ba-mai ne’e karreta manas, entaun ó fuma tan sigaru gaszolina nia iiis kona sigaru bele akontese ahi han karreta. Agora ahi han ona ó la hatene halo salvamentu, di’ak liu mak tenke iha formasaun,” Jesuíno rekomenda.
Nia subliña, dalabarak motirista sira sempre fó sala ba Bombeiru bainhira halo atuasaun tarde, maibé ne’e la’ós kulpa Bombeiru nian maibé dalaruma iha dalan mosu engrafamentu.
“Dalaruma Bombeiru to’o tarde atu halo atuasaun, sira hirus Bombeiru, ita la hanoin katak iha dalan agora kondisaun estrada ita-nian Governu hadi’a hela, kareta movimentu barak, ida-ne’e mós fó impaktu. Entaun, motorista sira tenke tuir formasaun. MTK mós tenke haree veikulu ne’ebé tuan liu ona, di’ak-liu labele autoriza halai ou tula pasajeiru ne’e fó risku ba ema-nia vida,” nia hateten.
Iha sorin seluk, Motorista Mikrolete 11 diresaun Tasi-Tolu-Manleuana, Joel Martins, hateten konkorda ho APC nia hanoin tanba ne’e di’ak oinsá bele tulun sira halo atuasaun rasik bainhira ahi han karreta ne’ebé sira lori.
“Hanoin husi APC ne’e di’ak tebes. Ha’u hanesan motorista, ha’u konkorda maibé bainhira mak sira fó formasaun mai ami. Ami hato’o agradesementu bainhira hetan formasaun sira hanesan ne’e,” Joel hateten.
Tanba ne’e, nia nia mós rekomenda ba MTK liuliu Diresaun Nasionál Transporte Terrestre (DNTT) hamututuk ho Polísia Nasionál Timor-Leste (PNTL) Unidade Tránzitu atu kontrola transporte públiku hirak ne’ebé ho kondisaun tuan liu ona ne’e labele tula bebeik pasajeiru, ne’e mós fó risku ba ema-nia vida.
Jornalista : Hortencio Sanchez
Editór : Cancio Ximenes
