CAC halo ezame ba Jerente Timor GAP nia telemóvel
DILI, 21 Janeiru 2026 (TATOLI)—Komisaun Nasionál Antí-Korrupsaun (CAC, sigla portugés) daudaun ne’e halo hela ezame ba Vise-Prezidente Timor GAP ho inisiál AC nia telemóvel hafoin halo buska no apreensaun iha nia rezidénsia iha loron hirak liubá.
“Prosesu ne’e tanba ita sei hein hela ezaminasaun ba telemóvel. Ita iha ne’e (CAC) rasik laiha ekipamentu téknika própria ba ezaminasaun telefone, entaun ita serbisu hamutuk ho PCIC (Polísia Sientífika no Investigasaun Kriminál) ho orientasaun Ministériu Públiku nian, agora parte PCIC mak halo ezaminasaun ba telemóvel,” Diretór Jerál CAC, José Verdial hato’o ba Jornalista sira, iha ninia knaar fatin, Farol, Kuarta ne’e.
Notísia relevante : CAC klarifika buska no apreensaun iha Dirijente Timor GAP nia rezidénsia
Nia dehan, objetu sira ne’ebé CAC rekolla iha Vise-Prezidente Timor GAP nia uma mak karreta no dokumentu apropriadu, daudaun iha ona Ministériu Públiku (MP) hodi husu Tribunál halo validadasaun.
“Iha karreta ida mak ita foti daudaun iha hela Ministériu Públiku,” nia akresenta.
Informa mós katak, CAC sei kontinua halo investigasaun ba kazu ne’e rasik maibé hein hafoin PCIC konklui lai ezamisaun ba AC nia telemóvel.
“Rezultadu ezaminasaun ba telemóvel seidauk haruka mai, ita sei hein, rezultadu ezaminasaun hotu ona haruka ona mai mak ita foin kontinua,” nia katak.
Jornalista : Natalino Costa
Editora : Julia Chatarina
