KOVALIMA, 21 Janeiru 2026 (TATOLI) – Autoridade Munisípiu Kovalima liuhusi Servisu Munisipál Saúde (SSM) Kovalima rejista sidadaun na’in-36 mak durante-ne’e halokan sira-nia vida tanba sofre moras HIV/SIDA (Virús da Imudeficiénsia Humana).
“ Hahú iha 2012 to’o 2025 ita rejista kazu kumulativu sidadaun ne’ebé sofre moras HIV hamutuk 103 tanba iha 2025 ne’e ita deteta tan sidadaun na’in-12 maka sofre moras HIV nune’e balun halo tratamentu iha munisípiu, balun transfere sai no laiha ida mak halai husi tratamentu”, Diretór Servisu Saúde Munisípiu Kovalima, Domingos Sequeira, informa ba jornalista sira, iha Ladi-Suai, ohin.
Dirijente Saúde ne’e dehan, pasiente balun transfere sai ho razaun tanba presta sira-nia servisu iha Díli no fatin sira seluk, nune’e pasiente hirak ne’e kontinua halo tratamentu.
Nia esplika, pasiente na’in-36 ne’ebé sofre moras HIV to’o lakon sira-nia vida tanba deteta moras HIV tarde no aumenta ho moras komplikasaun hodi hatun imunidade, nune’e la konsega salva sira-nia vida
“Daudaun ne’e, komunidade sira laiha konsénsia no inisiativa rasik atu hasai ran, maibé ita iha ona estratéjia. Se de’it mak vizita fasilidade saúde obrigatóriu hasai nia ran hodi haree ba HIV , ita sei la ko’alia atu teste ba moras HIV. Ita dehan de’it koko ran hafoin bele halo tratamentu saúde”, nia afirma.
Nia husu ba komunidade sira atu uza kondom bainhira halo relasaun seksual hodi prevene aan husi moras HIV/SIDA.
“ Ita nafatin sosializa informasaun ba komunidade sira atu vizita sentru saúde no uza kondom bainhira halo relasaun seksual nune’e bele redús kazu HIV iha munisípiu Kovalima”, nia fó hanoin.
Jornalista: Celestina Teles
Editór: Florencio Miranda Ximenes
