DILI, 21 Janeiru 2026 (TATOLI)—Estudante iha Baukau hamutuk rihun 30-resin sai benefisiáriu ba implementasaun Programa Merenda Eskolár (PME) iha tinan 2026.
Diretór Serbisu Edukasaun Munisipál Baukau, Afonso dos Santos da Costa esplika, tinan-ne’e, prosesu implementasaun PME sedu tanba orsamentu ho totál rihun $70 tinan 2025 seidauk ezekuta no sei iha konta banku Ekipa Jestaun Programa (EJP) ne’ebé hola-parte husi orsamentu tinan 2026 nian.
“Orsamentu ne’ebé ami kalkula to’o nia tempu ami fó filafali bá kofre Estadu, entaun orsamentu sira-ne’ebé hela, ami fahe ba EJP hodi implementa sedu iha 20 Janeiru 2026,” Afonso informa ba TATOLI liuhusi telefónema, Kuarta ne’e.
Notísia relevante: ME identifika eskola balun implementa merenda eskolár la tuir menu
Afonso relata númeru benefisiáriu iha tinan letivu 2026 kompostu husi pre-eskolár, ensinu báziku primeiru, segundu no terseiru siklu ne’ebé sei implementa ho loron efetividade 150 iha-ne’ebé kada estudante konsume ai-han hanesan pursentu 2 produtu importadu no pursentu 75 maihusi produtu lokál.
“Ita esforsu nafatin atu hamoris no motiva grupu agrikultór sira para oferese produtu lokál,” nia akresenta.
Entretantu, implementasaun Programa Merenda Eskolár iha Munisípiu Baukau ho valór orsamentu $2.788.690, fó benefisiu ba estudante 34.614 kompostu husi pre-eskolár, ensinu báziku primeiru, segundu no terseiru siklu.
Jornalista: Natalino Belo
Editór: Xisto Freitas da Piedade
