DILI, 21 Janeiru 2026 (TATOLI)—Prezidente Konsellu Administrasaun Institutu Nasionál Seguransa Sosiál-Fundu Rezerva Seguransa Sosiál (INSS-FRSS), Zeferino da Costa Bobo, hateten presiza halo identifikasaun ba problema pensaun sosiál iha territóriu tanba públiku kestiona maka’as pagamentu pensaun sosiál.
“Problema pensaun sosiál ba ferik-katuas no ema ho defisiénsia sira durante ne’e. Ita tenta kontinua rezolve ita-nia atendimentu ba sira inklui ho banku BNCTL maibé seidauk efetivu liu, tan ne’e ita hotu nia responsabilidade tanba dirijente nia kna’ar mak atu buka deskobre no fó solusaun ba problema hodi orienta tékniku hodi identifika,” Prezidente Bobo dehan ba jornalista bainhira partisipa pose ba kargu xefia sira iha INSS, Kuarta ne’e.
Tanba, tuir nia katak públiku hein hela prestasaun servisu, dala-barak iha mudansa ba estrutura maibé esperansa povu no públiku hakarak liu prestasaun atendimentu ba sira ho fásil no lais.
“Nune’e, hahú ohin bá-oin husu ba Diretora Ezekutivu ho nia dirijente sira ita tenke hamutuk halo avaliasaun ba ita-nia servisu kada fulan no kada semana, husu ba kada departamentu to’o koordenadór sira iha munisípiu diskute no hamosu solusaun ne’ebé ita enfrenta,” nia sujere.
Tanba antes ne’e, identifika iha problema rua mak distánsia dook hosi fatin simu osan no sira seidauk iha Kartaun Identidade.
Bobo hatutan, atu solusiona problema ne’e, presiza servisu hamutuk ho Diresaun Nasionál Notariadu nian para fasilita dokumentu nesesariu sira. Tanba problema rua ne’e mak sempre públiku kestiona maka’as.
“Problema ne’ebé hasoru mak fatin ba pagamentu dook husi sira-nia hela fatin tantu maihusi rejime kontributivu ka naun-kontributivu. Dezafiu ida seluk mak iha jestaun administrativu, balun rejista ona ka naran iha ona sistema, maibé to’o tempu ba foti osan, osan la tama. Ida-ne’e mak ita presiza haree no hadi’a,” nia dehan.
Entretantu, Emposada Ana Romana hateten nia kontinua hala’o servisu ne’ebé mak dirijente sesante husik hela.
“Tanba ne’e, prioridade ida iha mandatu ida-ne’e mak hadi’a atendimentu ba públiku, fortalese kapasidade institusionál, identifika lakuna operasionál iha sistema jestaun no prestasaun servisu, no kompromete atu implementa medida korretiva ne’ebé konkretu no sustentavel,” nia tenik.
Iha fatin hanesan, Ministra Solidariedade Sosiál no Inkluzaun (MSSI), Verónica das Dores dehan seguransa sosiál nesesita responsabilidade, onestidade, transparénsia ho espíritu nasionalizmu no patriotizmu, labele halo servisu mesak-mesak, maibé presiza kolaborasaun.
“Momentu ida-ne’e importante tebes. Iha setór seguransa sosiál ida-ne’e sai pilár fundamentál ba dezenvolvimentu umanu, sosiál no kapitál, garantia, tane aas seguransa sosiál ne’ebé sidadaun sira hotu, rekoñese no esforsu kontributiva traballadór sira-nian. Tanba ne’e, misaun INSS-FRSS ezije rigór, transparénsia, efisiénsia, efikásia no aprofunda liután ba servisu públiku,” Ministra dehan.
Jornalista: Osória Marques
Editór: Xisto Freitas da Piedade
