Saúde Kovalima kontinua partilla informasaun ba komunidade hodi prevene moras dengue
KOVALIMA, 21 Janeiru 2026 (TATOLI) – Servisu Saúde Munisipál Kovalima kontinua partilla informasaun kona-ba moras dengue ba komunidade, tanba daudaun-ne’e tempu udan.
“ Ita nafatin partilla informasaun liuhusi programa Edukasaun Promosaun Saúde (EPS) ba komunidade tanba daudaun ne’e tempu udan halo moras dengue sa’e maka’as. Promosaum me’e ita halo atu komunidade bele prevene aan husi moras dengue“, Diretór Servisu Saúde Munisípiu Kovalima,Domingos Sequeira informa ba Jornalista sira iha Ladi-Suai, ohin.
Mekanizmu faze informasaun, nia dehan pesoál saúde sira uza maneira sira hanesan liuhusi individual no bainhira iha kazu ka deteta pozitivu ba dengue fó aimoruk ba pasiente sira atu bele rekoopera.
Tuir Mapamentu fasilidade saúde, iha Munisípiu Kovalima iha nia Sentru Saúde Komunitáriu (SSK) hitu hanesan Postu Saúde hamutuk 25, SISCA 15, Mobile Konsulta 22 ,ospitál referál ida no klinika privadu rua ne’ebé maka eziste iha munisípiu Kovalima.
Jornalista: Celestina Teles
Editór: Florencio Miranda Ximenes
