VIKEKE, 21 Janeiru 2026 (TATOLI)—Servisu Ministériu Agrikultura, Peska, Pekuária no Floresta (SMAPPF) Munisípiu Vikeke atuál Xefe Departamentu Veterinária, Domingos do Carmo Pinto, relata SMAPPF vasina ona balada hamutuk 1.893 hodi prevene vírus raiva.
“Kona-ba prevensaun vírus raiva iha Munisípiu Vikeke tinan kotuk ita hahú vasina asu, busa no lekirauk hamutuk rihun 1.893. Vasinasaun ne’e ita foin kobre iha postu rua mak hanesan postu Vikeke Vila iha suku rua no Postu Lakluta iha suku haat, maibé ba postu seluk seidauk,” Domingos do Carmo Pinto ba TATOLI iha Postu Vikeke Vila, Kuarta ne’e.
Domingos hatutan programa vasina ne’e ba postu tolu (Ossú, Uatulari no Uatukarbau) mak seidauk implementa nune’e sei bá koordena fali nasionál hafoin kontinua ba postu tolu referidu.
“Ita iha postu tolu mak seidauk implementa vasinasaun. Tan ne’e, ha’u sei bá konfirma fali sira nasionál bainhira mak sira fó oráriu bá ita, hafoin ita bá halo vasinasaun,” Domingos tenik.
Notísia relevante: Ekipa MAPPF hahú vasina asu ba prevensaun vírus rabies iha Vikeke
Nia haktuir ai-moruk vasinasaun ba balada daudaun ne’e sei iha dose 200 viál.
Tuir dadus, balada ne’ebé hetan ona vasina iha Postu Vikeke Vila kompostu husi asu hamutuk 1.240, busa 68, lekirauk lima (5) no Postu Lakluta vasina asu hamutuk 580.
Entretantu, funsionáriu Departamentu Veterináriu Munisípiu Vikeke totál hamutuk na’in-15 ne’ebé fó vasina ba komunidade nia balada iha Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
