BOBONARU, 22 Janeiru 2026 (TATOLI) – Eskola Bázika Sentrál (EBC, sigla portugés) simu ona apoiu materiál husi Ministériu Edukasaun (ME), hafoin anin-boot sobu uma-kakuluk eskola nian.
Diretór EBC Tapo, Casemiro Pinto, informa katak parte eskola simu, ohin, apoiu materiál hanesan zinku tahan 200, pregu, besi baja no seluk tan hodi tulun halo reabilitasaun ba saladeaula ne’ebé anin sobu tiha nia kakuluk.
“Dezastre akontese ba dala-tolu ona, ida mak rai-halai, ida edifisíu ne’ebé konstrui husi F-FDTL ne’e anin loke iha 2023. Agora mós akontese tan loke edifísiu rua, ida foin finaliza husi programa PNDS, seidauk uza, tanba foin semana rua liubá ne’e mak entrega mai ami. Ida fali mak projetu komunitáriu nia ne’ebé konstrui iha 2016”, nia relata.
Casemiro Pinto haktuir katak tanba anin foin daudaun sobu kalen saladeaula tolu iha EBC Tapo maka provizoriamente prosesu ensinu no aprendizajen para hela.
“Depoizde akontesimentu ha’u bá haree situasaun la permite duni atu halo prosesu ensinu no aprendizajen. Ha’u hatún despaxu ida katak provizoriamente prosesu ensinu aprendizajen paradu, tanba de’it klima, udan ho anin maka’as. Ita lakohi estudante sira hetan dezastre, maibé ba funsionáriu sira kontinua tama serbisu”, nia salienta.
Ho dezastre naturál ne’ebé tinan-tinan danifika infraestrutura eskolál maka dirijente eskola, komunidade no líder komunitáru sira husu ba Ministeriu Edukasaun atu halo estudu bainhira halo reabilitasaun ka konstrusaun eskola, nune’e bele apár ho situasaun no klima.
José Amaral, Xefe Aldeia Tapo-Taz, dehan obra ne’ebé Governu konstrui durante ne’e hetan ameasa husi anin-boot, liuliu foin lalais iha loron 19 Janeiru ne’e danifika sala aula-lima tanba estrutura uma-kakuluk la metin no fasíl anin loke.
“Estadu atu halo karik labele modelu ida hanesan agora. Halo para anin labele sobu, hanesan uma nia kuda-kuda ne’e labele uza besi baja, di’ak liu nia kuda-kuda uza de’it ai, tanba ami Tapo ne’e anin-boot, tinan-tinan, eskola ne’e anin foti beibeik”, José Amaral sujere.
EBC Tapo iha saladeaula 17 no iha estudante hamutuk 309 no manorin 17. EBC ne’e akumula mós estudante Ensinu Báziku terseiru siklu husi suku Leber no Oe-leu.
Notísia relevante: Servisu Edukasaun Bobonaru submete pedidu emerjénsia ba ME atu reabilita EBC Tapo
Jornalista: Sergio da Cruz
Editora: Maria Auxiliadora
