INSS prepara millaun $23 ba pagamentu pensaun sosiál iha Marsu
DILI, 22 Janeiru 2026 (TATOLI)—Prezidente Administrasaun Institutu Nasionál Seguransa Sosiál no Fundu Rezerva Seguransa Sosiál (INSS-FRSS), Zeferino da Costa Bobo, hateten INSS prepara millaun $23 ba pagamentu pensaun sosiál períodu dahuluk ne’ebé sei akontese iha Marsu tinan ne’e.
“Ita hotu hatene katak baibain kada fulan tolu foin halo pagamentu seguransa sosiál ba ferik-katuas no ema ho defisiénsia sira. Nune’e, iha Marsu ita sei halo pagamentu ba ema ho defisiénsia sira no ferik-katuas hamutuk 108.613,” Prezidente Zeferino Bobo dehan ba joranalista sir iha nia kna’ar fatin, Kaikoli, Kinta ne’e.
Prezidente INSS Zeferino subliña hosi 108.613 ne’e ferik-katuas hamutuk 97.650 no ema ho defisiénsia na’in 10.963.
“Pagamentu ne’e ita halo akordu ho BNCTL hodi halo pagamentu. Ita hamutuk ho BNCTL identifika benefisiáriu sira-ne’ebé kondisaun moras la’o labele sei bá halo pagamentu to’o iha sira-nia uma,” nia tenik.
Zeferino haktuir dezafiu iha pagamentu mak distánsia dook maibé INSS ho Banku Nasionál Komérsiu Timor-Leste (BNCTL) halo pagamentu to’o ramata. Nune’e, iha Marsu halo pagamentu hotu hafoin hatene ema mate hira no sira-ne’ebé simu ona ne’e hira.
“Ferik-katuas no ema ho defisiénsia ne’ebé laiha Automated Teller Machine (ATM) ne’e fulan tolu ami bá selu iha sira-nia fatin, maibé ba sira-ne’ebé ATM iha foti direta iha kada fulan. Benefisiáriu sira-ne’ebé uza ona ATM hamutuk 14.126,” nia esplika.
Entidade empregadór 6.309 rejistadu iha INSS
Iha parte seluk, Prezidente Administrasaun Institutu Nasionál Seguransa Sosiál no Fundu Rezerva Seguransa Sosiál (INSS) informa entidade empregadór públiku no entidade privada hamutuk 6.309 mak rejistu ona iha INSS.
“Entidade empregadór sira husi tinan 2025 to’o 2026 tuir dadus atualiza husi online iha setór públiku mai rejistu iha seguransa sosiál hamutuk 126 no setór privadu hamutuk 6.183. Aleinde ne’e, traballadór timoroan sira iha setór públiku hamutuk 86.164 no traballadór timoroan setór privadu hamutuk 91.178,” Prezidente INSS dehan ba jornalista sira iha nia kna’ar fatin, Kaikoli, Kinta ne’e.
Bobo dehan sira-ne’e ativa no fulan-fulan kontribui seguransa sosiál maibé ba fakultativu ka ema ne’ebé halo negósiu ne’e hamutuk 300 mak la ativu ona.
“Negosiante 300 ne’e uluk mai simu osan iha situasaun pandémia COVID, depoiz liu tiha sira la mai ona ativa iha sistema,” Zeferino haktuir.
Nia dehan to’o agora kontinua nakloke ba traballadór no entidade empregadór sira inklui fakultativu atu mai rejistu nune’e bele asegura ema idak-idak nia seguransa sosiál iha futuru bainhira idade reforma.
Jornalista: Osória Marques
Editór: Xisto Freitas da Piedade
