VIKEKE, 22 Janeiru 2026 (TATOLI)—Xefe Suku Afaloikai, Postu Administrativu Uatukarbau, Munisípiu Vikeke, Abílio Soares informa komunidade Suku Afaloikai hamutuk uma-kain 128 daudaun ne’e seidauk asesu ba liña eletrisidade.
“Ita ukun an tinan 25 ona, maibé iha ami-nia Suku Afaloikai ne’e populasaun purvolta uma-kain 128 mak to’o agora seidauk asesu ba liña eletrisidade. Tanba ne’e, ha’u solisita Governu oinsá tau-matan ba populasaun nia preokupasaun sira iha baze liuliu liña eletrisidade,” Abilio Soares ba TATOLI iha Postu Vikeke Vila, Kinta ne’e.
Autoridade suku ne’e relata katak populasaun ne’ebé seidauk asesu ba liña eletrisidade mak hanesan iha área Urulale, Batakolale no Betu-Ulu.
“Durante ne’e sira la asesu ba liña eletrisidade, nune’e iha tempu kalan komunidade depende ba lamparina no lilin. Ida-ne’e sai mós dezafiu ba ita-nia oan estudante sira ne’ebé estuda iha tempu kalan,” nia tenik.
Kona-ba preokupasaun ne’e, nia dehan, parte autoridade halo pedidu direta ba Eletrisidade de Timor-Leste, Empreza Públika (EDTL, E.P.) no Ministériu Obra Públika (MOP), maibé to’o agora seidauk dada eletrisidade ba populasaun.
Tuir dadus, populasaun husi Suku Afaloikai iha totál aldeia hamutuk haat, abitante hamutuk 1.939 no uma-kain 365.
Jornalista: Vitorino Lopes da Costa
Editór: Xisto Freitas da Piedade
