DILI, 22 Janeiru 2026 (TATOLI)—Ministériu Saúde liuhusi Gabinete Inspesaun no Auditória halo diseminasaun ba dekretu-lei nú. 2/2025 kona-ba importasaun, armazenamentu distribuisaun fa’an no esportasaun produtu farmaséutiku no ekipamentu iha munisípiu hitu (7) hanesan Aileu, Baukau, Oekusi, Kovalima, Likisá, Ermera no Díli.
Inspetór Gabinete Inspesaun no Auditória, Horácio Fernandes, hateten diseminasaun ne’e implementa iha munisípiu hitu ne’ebé mensionadu, enkuantu iha munisípiu sira seluk sei kontinua halo diseminasaun hahú iha fulan-Marsu, tanba munisípiu ne’ebé faan ai-moruk barak hanesan iha Aileu 32 no Kovalima 32 no restante iha munisípiu seluk.
“Kona-ba ami-nia inspesaun iha kioske no loja sira tanba dekretu lei ne’e la autoriza sidadaun sira-ne’ebé heta rekoñesementu husi SERVER atu faan fali ai-moruk,” Inspetór Gabinete Inspesaun no Auditória, Horácio Fernandes, informa ba jornalista sira iha nia kna’ar fatin Kaikoli, ohin.
Nia hatutan, durante tinan ida sira halo inspesaun hamutuk 67 ne’ebe mak sira hetan ai-moruk sira rekolla hotu hafoin fó notifikasaun ba kioske na’in para ba futuru labele faan.
“Tinan ida kotuk ami foti ai-moruk sira-ne’ebe sira faan no notifika ona. Ami informa hela kedas katak ita-boot hetan lisensa husi SERVER ne’e faan mak tanba nesesidade bázika la’ós faan fali ai-moruk. Se faan nafatin mak ami sei kondena ita-boot sira,” nia informa.
Nia hatutan, sira-ne’ebé hetan ona notifikasuan ka foti ona sira-nia ai-moruk ne’e, Ministériu Saúde fó tempu ba negosiante sira durante fulan-tolu (3) to’o neen (6) hodi trata sira-nia lisensiamentu se liu ona fulan neen (6) sei halo destrusaun.
Aleinde ne’e, sira mós halo ona inspesaun ba farmásia importadora no retallu hamutuk 110 husi númeru ne’e iha estabelesimentu tolu mak kontra no selu ona taxa ba Governu hamutuk $2.500.
“Ida-ne’e kontra mak seidauk hetan lisensiamentu husi Ministériu Saúde maibé halo ona servisu, ida fali medikamentu balun nia data liu ona (expired) maibé nafatin faan no seluk mak halo atividade fó konsulta ema maibé laiha lixu fatin hodi soe foer medikamentu nian,” nia dehan.
Jornalista : Alexandra da Costa
Editór : Cancio Ximenes
