DILI, 22 Janeiru 2026 (TATOLI) –Ministra Solidariedade Sosiál no Inkluzaun, Verónica das Dores, klarifika razaun Konsellu Ministru ezonera Prezidente Administrasaun Institutu Nasionál Seguransa Sosiál (INSS), Arlindo Pinto tanba hasa’e saláriu ba kargu xefia sira iha INSS ba dala haat iha tinan ida nia laran.
“Ita hatene katak kontratu termu sertu labele hasa’e saláriu ba kargu xefia sira ne’ebé serbisu iha instituisaun referidu,” Ministra dehan ba jornalista sira iha salaun MSSI Kaikoli, Kuarta ne’e.
Nia esplika avaliasaun ne’e iha kada tinan ba kargu xefia sira, la’ós kada fulan halo avaliasaun.
“Prezidente INSS sesante Arlindo Pinto nia desizaun la tuir kontratu termu sertu ne’ebé iha, nune’e nia aumenta osan ba ema sira-ne’e tuir hakarak,” governante ne’e subliña.
Prezidente Institutu Nasionál Seguransa Sosiál (INSS) sesante, Arlindo Pinto rejeita deklarasaun Ministra Solidariedade Sosiál no Inkluzaun, Verónica das Dores, relasiona ho hasa’e saláriu funsionáriu INSS dala haat durante tinan ida nia laran.
“Tempu ne’ebé oportunu atubele halo autodefeza tanba ha’u-nia kredibilidade. Lialoos nunka mate. Ministra MSSI Verónica das Dores komesa hala’o deklarasaun laloos hodi hamonu ha’u-nia integridade. Tanba ha’u Arlindo Pinto nunka atu hakiduk ba deklarasaun falsu sira. Ministra Verónica uza nia podér hodi ezonera ha’u sein ho faktu,” Arlindo haktuir iha ninia pájina ofisiál ne’ebé TATOLI asesu, Kinta ne’e.
Nia esplika administrasaun INSS no Fundu Rezerva Seguransa Sosiál (FRSS) nu’udár sub-setór finanseiru ketak ida husi Administrasaun Sentrál. INSS no FRSS implementa no ezekuta administrasaun ho independente no halo koordenasaun de’it ho Ministériu tuteladu. Depoiz tinan rua servisu administrasaun sira la’o di’ak maibé iha fulan tolu (3) ikus ba tinan 2025, Ministra komesa boikota Administrasaun INSS no FRRS nia ezekusaun.
“Ministra nia hakarak buat hotu tenke integra ba MSSI, nune’e ha’u-nia intervensaun katak INSS no FRRS instituisaun públika hodi asegura nafatin atendimentu públiku ba rejime kontribuitivu nian. Ho ida-ne’e mak Ministra uza nia podér hodi orienta ninia auditória hodi halo investigasaun iha administrasaun INSS no FRSS maski ministra nia desizaun ne’e kontra Lei no Dekretu-Lei INSS no FRSS nian. Tanba ne’e mak ha’u defende regra sira no Ministra lakohi simu ida-ne’e hodi halo defamasaun tun-sae, ataka ha’u-nia privasidade nune’e ha’u foti desizaun katak orientasaun ministra MSSI nian ne’e laloos,” nia akresenta.
Notísia relevante: Governu deside ezonera Arlindo Pinto husi kargu Prezidente INSS
Arlindo subliña pesoál traballu iha INSS ho FRSS ne’e tuir estatutu kontratu termu sertu bazeia ba sira-nia abilidade no rezultadu servisu. Uza saláriu termu sertu la implika ba planu orsamentu kada tinan.
“Ida-ne’e Ministra laran moras hodi hato’o karta ezonerasaun ba Konsellu Ministru. Hosi ne’e Ministra komesa halo intervensaun ba ezekusaun administrativa iha INSS no FRSS. Maibé, ha’u nafatin halo intervensaun ba Ministra nia desizaun,” nia tenik.
Aleinde ne’e, tuir Arlindo, hasa’e saláriu protokolu sira-nian ne’e laloos tanba kontartu termu sertu sira bazeia ba kontratu fulan neen (6) no tinan ida konforme halo avalisaun ba progresu no tarefa servisu ne’ebé aumenta mak hafoin halo renovasaun ba kontratu.
“Ha’u sei la nonook kuandu Ministra hakarak hato’o lia falsa sira iha mídia hodi hamonu ha’u-nia integridade iha publiku,” nia realsa.
Jornalista: Osória Marques
Editór: Xisto Freitas da Piedade
