BOBONARU, 22 Janeiru (TATOLI) – Diresaun Servisu Agrikultura Munisípiu Bobonaru identifika ona rai ektare 1.010 mak preparadu atu kuda hare époka dahuluk tinan 2026, ne’ebé lokaliza iha postu administrativu Atabae, Kailaku no Maliana Vila.
Husi totál rai ne’e, ektare 510 sei utiliza ba halo lansamentu ba kultivasaun hare variedade foun Imapare 32, ne’ebé Governu distribui ona nia fini tonelada 12,7 ba agrikultór sira ne’ebé pertense ba irrigasaun Maliana I.
Diretór Servisu Agrikultura Munisípiu Bobonaru, Longuinhos João, dehan iha área Maliana II, Kailaku no Atabae, Governu distribui fini hare Nakroma II hamutuk tonelada 12, ne’ebé sei kuda iha rai ektare 500-resin no daudaun ne’e prepara hela ba viveiru.
Governu mós apoia ona kombustivel gratuita ba agrikultór sira no prepara hela adubu orgániku, inklui ai-moruk pestisida ho totál kaixa 10 atu antesipa atake husi Karakól, ne’ebé estraga beibeik hare-oan, partikularmente iha Maliana I no II.
“Ita-nia alvu ba tinan ida-ne’e koko ho variedade foun Impare 32 ne’e mínimu kada ektare [sei rezulta hare] tonelada haat. Se liu ida-ne’e di’ak liután, maibé ne’e sistema ne’ebé ita aplika. Daudaun ne’e ita aplika hela prátika ida sistema agrikultura di’ak. Barak liu sei kuda ho konvensionál, balun sei uza sistema tradisionál, liuliu sira ne’ebé dependente ba udan-been”, dehan.
Longuinhos mós destaka kona-ba envolvimentu mínimu husi jerasaun foun sira iha setór agríkola. Tanba ne’e, Governu kontinua enkoraja joven sira atu ajuda inan-aman iha natar hodi garante produsaun ai-han ne’ebé sustentavel.
“Agrikultura la’ós serbisu ki’ik ida, maibé fonte prinsipál ai-han nian ba ema hotu. Ami kontinua enkoraja envolvimentu juventude nian no apoia sira ho rekursu sira ne’ebé disponivel” nia garante.
Tuir dadus husi Diresaun Servisu Munisipál Agrikultura, produsaun hare époka daruak tinan 2025 iha Bobonaru atinje mínimu toneldas 3 ba kada ektare no másimu tonelada 5,5.
Notísia relevante: MAPPF aposta iha kualidade agrikultura orgánika hodi kompete iha merkadu ASEAN
Jornalista: Sergio da Cruz
Editora: Maria Auxiliadora
