DILI, 22 Janeiru 2026 (TATOLI)—Sekretariu Estadu Terra no Propriedade (SETP), Jaime Xavier Lopes, hateten, daudaun ne’e orienta ona tékniku sira halo hela levantamentu dadus ba rai no uma Estadu iha kapitál Dili hodi prepara ba kontratu selu arendamentu.
“Ida-ne’e ha’u fó ona orientasaun para foti ona dadus hodi halo kontratu arendamentu, atu nune’e sasan Estadu nian bele hatama reseita,” Sekretariu Estadu ne’e hateten ba Agência TATOLI iha edifisiu Asosiasaun HAK, Faról, kinta ne’e.
Nia dehan, hahú husi tinan 2000-2024, Terra Propriedade hatama reseita ba Estadu liuhusi arendamentu ba rai no uma Estadu nian kuaze millaun $80-resin.
“Iha tinan 2025 ne’e, ita hatama reseita husi arendamentu sira-ne’e kuaze millaun $6 hanesan ne’e, maibé ita buka meiu nafatin atu 2026 ba oin ne’e ita bele hatama reseita liuhusi númeru ne’ebé ha’u temi ne’e,” Jaime informa.
Nia hatutan, tipu reseita ne’ebé rekolla mai husi rezidénsia, negósiu no edifisiu no rai ne’ebé misaun diplomata estranjeiru sira utiliza hanesan Embaixada sira no Organizasaun Naun Governamentál Internasionál sira utiliza edifisiu Estadu nian.
“Reseita sira ne’e la’ós taxa, maibé ita rekolla husi kontratu arendamentu,” nia dehan.
Jornalista : Hortencio Sanchez
Editór : Cancio Ximenes
