DILI, 22 Janeiru 2026 (TATOLI)—Ekipa Portu Taibessi preparadu kontra Coração Football Club (FC) iha jogu Tasa Liga Federasaun Futeból Timor-Leste (FFTL).
Treinadór Portu Taibessi, Hengki Noguera esplika ekipa referida prepara ba kompetisaun Tasa liga FFTL durante semana rua-resin no garante sei gaña pontu bainhira kontra Coração FC ne’ebé tuir órariu sei realiza iha Estádiu Munisipál Dili, Sesta (23/01/2026).
“Ami hakarak manán maibé futeból sei determina iha minutu 90,” Treinadór Portu Taibessi hateten iha Estádiu Munisipál Dili, Kinta ne’e.
Notísia relevante: Tasa Liga FFTL 2025, AD SLB impata ho Emanuel FC, DIT derrota 1-2 ho Assalam
Hengki Noguera haktuir istorikumente Portu Taibessi iha tinan kotuk manán ona Coração ho skor 1-0 bainhira kompete iha Liga Futeból Timor-Leste (LFTL), nune’e nia parte kontinua hakarak gaña vitória iha kompetisaun ne’e.
Iha fatin hanesan, Treinadór Coração FC, Gaspar Amaral hateten mezmu preparasaun mínima maibé ekipa Coração komprometidu atu halakon Portu Taibessi no garante sei kompetitivu iha turneiu Tasa Liga FFTL 2025.
“Ami konsidera jogu dahuluk importante atu rekolla pontu tolu,” Gaspar argumenta.
Nia salienta Coração hakarak sai kampiaun maibé ekipa hotu iha ambisaun hanesan no rezultadu jogu mak sei determina ekipa ne’ebé mak sai kampiaun dahuluk ba Tasa Liga FFTL.
Amaral louva ho inisiativa FFTL hodi kria kompetisaun iha tinan-ne’e, iha-ne’ebé ho objetivu atu prepara kondisaun jogadór liuliu selesaun nasionál Timor-Leste ne’ebé di’ak iha futuru.
Entretantu, Portu Taibessi, Coração FC, FIEL no Lika-Lika Lemorai akumula iha grupu C. Totál ekipa hamutuk 13 mak partisipa iha kompetisaun Tasa Liga FFTL ne’ebé fahe ba grupu haat.
Jornalista: Natalino Belo
Editó: Xisto Freitas da Piedade
