DILI, 23 Janeiru 2026 (TATOLI)—Xefe Departamentu Diresaun Nasionál Promosaun Edukasaun Ministériu Saúde (MS), Miliza Vital hateten MS hala’o kampaña sensibilizasaun kona-ba medida prevensaun dengue ba rezidente sira iha Bekora no Komoro.
Xefe Departamentu Diresaun Nasionál Promosaun Edukasaun Ministériu Saúde relata Servisu Saúde Munisípiu Dili (SSMD) rejista kazu dengue hamutuk 223 iha semana datoluk fulan-ne’e, nune’e Diresaun Nasionál Promosaun Edukasaun presiza sensibiliza komunidade atubele elemina moras dengue.
“Ita hotu hatene katak durante ne’e akompaña situasaun dengue. Problema saúde públika moras ne’e la’ós e foin mosu iha tinan ida ne’e, maibé ne’ebé rekorrente ona iha tinan hirak liubá. Agora, dadus ne’e aumenta bebeik, tanba ne’e agora ita presiza hala’o sosializasaun no mobilizasaun komunidade atu kompriende oinsá hamoos sira-nia uma no buat seluk tan,” nia hateten ba jornalista sira iha nia kna’ar fatin, Dili, Sesta ne’e.
Notísia relevante: Janeiru 2026: Servisu Saúde Dili rejista kazu dengue hamutuk 223
Diretór ne’e informa aumentu dengue ne’e la’ós responsabilidade Ministériu Saúde nian mesak, maibé ema hotu ne’ebé envolve tenke haka’as-an hodi kombate dengue.
“Susar atu muda ema nia mindset (hanoin), hanesan ema idak-idak iha nia hahalok rasik, tanba ne’e liuhusi sosializasaun ida-ne’e bele komprende oinsá atu kombate moras sira,” nia hateten.
Nia hatutan moras dengue iha fulan Janeiru aumenta tanba kauza hosi udan no mós hosi infraestrutura ne’ebé la’o iha Dili, ne’ebé hamosu moras sira-ne’e.
“Ho infraestrutura ne’ebé funsiona lahó problema, bee sulin sai, atrai susuk sira no buat sira-ne’e hotu bele fó impaktu negativu ba saúde públika,” Miliza tenik.
Líder ne’e akresenta intervensaun Ministériu Saúde nian inklui halo fumigasaun, oho no edukasaun saúde hodi halakon proliferasaun susuk.
Medida sensibilizasaun kona-ba prevensaun moras dengue ne’e hala’o hamutuk ho estudante saúde públika iha Universidade da Paz (UPAZ), Universidade Dili (UNDIL) no Universidade Timor-Leste (UNITAL).
Iha parte seluk, Ludovina da Silva Pereira, reprezentante husi komunidade Suku Kamea dehan Ministériu Saúde nia divulgasaun ne’e hanesan lisaun ida hodi eduka komunidade kona-ba importánsia atu hadook-an husi lixu no evita moras sira.
Jornalista: Osória Marques
Editór: Xisto Freitas da Piedade
