Rede Profesór Istória Vikeke lori estudante na’in-41 bá vizita abrigu Uasadiga Ossú
VIKEKE, 23 Janeiru 2026 (TATOLI)—Pontu Vogál Rede Profesór Manorin Istória husi Munisípiu Vikeke servisu hamutuk ho Sentru Nasionál Chega (CNC-sigla portugeza) lori estudante Ensinu Báziku Sentrál (EBC-sigla portugeza) 01 Bai Meta no Sekundáriu Jerál Kalixa hamutuk na’in-41 bá vizita fatin abrigu Uasadiga, Suku Loihunu, Postu Administrativu Ossú.
“Ohin, ita lori ita-nia estudante sira husi eskola rua, EBC 01 Bai Meta no Sekundáriu Kalixa, atu estudante sira bele haree fatin abrigu sira-ne’ebé ita-nia FALINTIL subar ba. Tanba, durante ne’e, ita hanorin istória ba estudante sira, maibé sira seidauk haree fatin hirak-ne’e. Tan ne’e, ami realiza programa referidu,” António de Carvalho ba jornalista sira iha Uasadiga, Loihunu, Sesta ne’e.
Pontu Vogál ne’e esplika vizita tour ne’e ho objetivu atu estudante sira bele hatene abrigu sira-ne’ebé komadante FALINTIL subar fatin no vizita ne’e veteranu sira akompaña hodi konta istória ba estudante sira.
“Liuhusi vizita fatin istóriku sira-ne’e ita-nia estudante sira bele hatene abrigu sira-ne’ebé iha foho Uasadiga leten. Ha’u sente vizita ida-ne’e hanesan benefísiu ba ita-nia estudante sira hodi haree direta fatin istóriku ne’e hodi bele hatutan istória ba futuru,” nia haktuir.
Nia dehan, bá-oin kontinua implementa program tour ba fatin istóriku sira iha Munisípiu Vikeke, maibé depende ba finanseiru tanba iha Munisípiu Vikeke fatin rezisténsia sei barak.
Iha fatin hanesan, Reprezenta Servisu Edukasaun Munisípiu Vikeke, Emídio Amaral haktuir programa vizita fatin istóriku ne’e di’ak tebes ba estudante sira tanba husi vizita ne’e estudante sira bele hatene istória Timor-Leste.
“Tan ne’e, ita presiza agradese ba UNESCO no Chega tanba ho sira-nia apoia fundu ba rede manorin sira hodi implementa programa referidu. Ha’u hanoin bá-oin Ministériu Edukasaun (ME) presiza tau mós ba programa, atu lori ita-nia estudante sira ba vizita fatin istóriku sira tanba estudante sira-ne’e mak hanesan jerasaun foun presiza hatene istória pasadu sira,” nia subliña.
Iha biban hanesan, estudante Sekundáriu Kalixa, Evitania do Carmo Pinto, sente orgullu vizita fatin istóriku Uasadiga tanba durante ne’e estudante sira seidauk vizita fatin gerilleiru sira-nia knuuk iha tempu rezistésia.
“Ami sente orgullu tebes tanba bele vizita fatin ida-ne’e hodi rona istória husi ita-nia eis gerilleiru sira. Ha’u hanoin bá-oin presiza implementa nafatin programa sira-ne’e hodi vizita fatin istóriku sira, atu ami bele hatene ita-nia istória sira,” nia subliña.
Tuir observasaun jornalista TATOLI katak vizita fatin Uasadiga hahú tuku 10h00 no ramata iha tuku 12h00. Iha vizita ne’e estudante sente kontente no vizita ne’e la’o ho di’ak tanba hetan akompañamentu husi veteranu sira.
Entretantu, vizita ne’e partisipa husi estudante EBC 01 Bai Meta na’in-21 no Sekundáriu Kalixa na’in-20, akompañadu husi profesór na’in-ualu (8) no veteranu na’in-rua (2), ekipa Krúz Vermella Timor-Leste (CVTL) no Servisu Emerjénsia Médika Munisípiu Vikeke.
Jornalista: Vitorino Lopes da Costa
Editór: Xisto Freitas da Piedade
