DILI, 23 Janeiru 2026 (TATOLI)–Sekretáriu Estadu Komunikasaun Sosiál (SEKOMS), Expedito Dias Ximenes, sesta ne’e, hala’o enkontru koordenasaun ho Xefe Redasaun no Jerente Mídia Eletrónika no Mídia Emprime sira, hodi halo preparasaun ba kobertura Primeiru-Ministru Australia, Anthony Albanese,hala’o vizita iha Timor-Leste iha 28-29 Janeiru 2026.
“SEKOMS hala’o enkontru ho Xefe Redasaun sira, Diretór Informasaun sira no Dirijente meiu komunikasaun sosiál sira hodi ko’alia kona-ba oinsá atu halo kobertura ba Primeiru-Ministru Austrália, Anthony Albanese, ne’ebé sei vizita Timor-Leste iha loron 29 Janeiru ne’e,” Expedito Dias Ximenes hateten ba jornalista sira hafoin ramata enkontru.
Nia dehan, enkontru ne’e bazeia ba reuniaun ikus entre komisaun organizadora hala’o iha kinta (22 Janeiru 2026) ne’ebé lidera husi Vise-Primeiru-Ministru, Francisco Kalbuadi Lay.
“Horisehik enkontru ikus husi komisaun organizadora ba preparasaun vizita Pruimeiru-Ministru, Anthony Albanese, entaun ohin lidera fali enkontru ida atu nune’e fó sai regulamentu kobertura ba mídia sira hotu bele hatene, atu nune’e bele la’o tuir regra protokolu ne’ebé iha ona. Ida-ne’e mak enkontru ho Xefe Redasaun sira atu nune’e bele orienta sira-nia jornalista sira iha fatin-fatin ne’ebé Primeiru-Ministru sei vizita,” nia dehan.
Durante enkontru, jestór meiu komunikasaun sosiál sira hotu aseita ho regulamentu ne’ebé Governu fó sai no sei orienta jornalista sira hala’o kobertura ho másimu tuir regulamentu ne’ebé iha ona.
Tuir orariu ne’ebé iha, loron 28 fulan-Janeiru, Anthony Albanese sei to’o iha Timor-Leste ho aviaun privadu tuku 09h00 ne’ebé sei simu direta husi Prezidente Repúblika José Ramos Horta no Primeiru-Ministru Kay Rala Xanana Gusmão, sai husi Aeroportu Internasionál Prezidente Nicolau Lobato Dili kontinua kedan ba Palásiu Prezidensiál Nicolau Lobato Dili.
Durante iha Palásiu Prezidensiál, Anthony Albanese sei hala’o enkontru ho Prezidente Ramos-Horta, bainhira ramata enkontru Primeiru-Ministru ne’e liu ba deskansa iha Otel Palm Spring Fatuhada.
Hafoin deskansa durante minutu 15, Anthony Albanese kontinua vizita ba Palásiu Governu hodi hala’o enkontru bilaterál ho Xefe Governu Kay Rala Xanana Gusmão, hafoin ramata líder Australiano ne’e hakat liu ba Parlamentu Nasionál.
Iha loraik, Anthony Albanese ne’ebé akompaina husi Xefe Estadu no Xefe Governu ba Palásiu Nobre Lahane hodi jantár hamutuk no iha loron 29 fulan-Janeiru dadeer, tuku 07h00, Primeiru-Ministru ne’e fila hikas ba Austrália.
Jornalista : Hortencio Sanchez
Editór : Cancio Ximenes
