DILI, 24 Janeiru 2026 (TATOLI) – Iha ámbitu selebrasaun aniversáriu Diligente, meiu komunikasaun sosiál ida espesialmente ho lian portugés, ba dala-III, Sekretáriu Estadu Komunikasaun Sosiál (SEKOMS), Expedito Dias Ximenes, konsidera Diligente fó kontribuisaun signifikativu, la’ós de’it ba diseminasaun lian portugés, maibé ba mós jornalizmu investigativu iha Timor-Leste.
Ida ne’e sigfika katak, tuir governante, bele informa ho “rigorozu, kestiona ho responsabilidade, no serbí demokrasia ho independénsia ”.
Membru Governu ne’e rekoñese katak jornalista sira husi Diligente manán ona prémiu Konsellu Imprensa, inklui prémiu Adelino Gomes, hanesan rekoñesimentu ida ne’ebé klaru ba serbisu ida-ne’e no fonte orgullu ida ba setór komunisaun sosiál.
“Ha’u hakarak subliña katak rezultadu sira-ne’e sai mós fonte satisfasaun ba Sekretaria Estadu Komunikasaun Sosiál, liuhosi Konsultóriu Lian Portugés ba Jornalista sira, parseria ho Institutu Camões, fó apoiu ba meiu komunikasaun sosiál hodi halo revizaun lian portugés ba puplikasaun ho kualidade”, dehan Expedito Dias Ximenes.
Sekretariu Estdadu fós mós ninia apresiasaun ba ekipa Diligente no dezeja katak projetu ida-ne’e kontinua buras, kestiona no kontribui ba espasu públiku ida ne’ebé “informadu liu, pluralista no demokrátiku”.
Iha sorin seluk, Xefe Redasaun Diligente, Rilijanto Viana, infrma katak Diligente hanesan media indenpente ida ne’ebeé hala’o nia servisu ho krítiku no responsavel iha Timor-Leste ho publikasaun lian portugés.
“Iha viajen ida-ne’e, ami hasoru difikuldade sira, rezisténsia, no presaun. Dala barak, iha hakerek lia-loos, kestiona podér, no kumpre ita-nia devér jornalístiku, ita halo ona inimigu. Maibé iha momentu sira-ne’e duni maka ita konfirma ita-nia serbisu nia importánsia. Do’ok husi desmotiva ita, adversidade sira-ne’e fó forsa liután mai ita atu kontinua no atu reafirma, ho klareza no korajen, ita-nia kompromisu ba lia-loos, étika, no interese públiku”, akresenta.
Dirijente ne’e reforsa mós katak mídia hala’o papél esensiál hodi konsolida demokrasia, hametin sidadania, no defende interese públiku. Diligente reafirma ohin ninia kompromisu atu sai nafatin espasu pluralista, responsavel, no independente, fiél ba liberdade imprensa no promosaun lian portugés.
Nia mos agradese ba leitor no fonte sira Diligente nian ne’ebé durante ne’e lee notísia no mós fó sai informasaun ba Diligente hodi halo divulgasaun.
Eventu ne’e hetan partisipasaun husi Embaixadór Portugal iha Timor-Leste, Duarte Bué Alves, Embaixadór Uniaun Europeia iha Timor-Leste, Thorsten Bargfrede, no Prevedór Direitu Umanu no Justisa, Vírgilo Guterres ‘Lamukan’.
Jornalista: Ivonia da Silva
Editora: Isaura Lemos
