KOVALIMA, 25 Janeiru 2026 (TATOLI) – Sarani sira iha Munisípiu Kovalima,entusiazmu simu illas São João Paulo II husi Rejiaun Administrativa Espesiál Oekusi Ambeno (RAEOA) liuhosi Fronteira Terrestre Mota Masin, Salele iha Postu Administrativu Tilomar.
Hafoin Sarani simu illas São João Paulo II iha Fronteira Mota masin Sarani husi RAEOA hamutuk ho Sarani sira husi munisípiu Kovalima lori illas mahein São João Paulo II hala’o prosesaun husi fronteira mai to’o iha Igreja Ave Maria Suai.
“Sarani no Autoridade Kovalima simu illas mahein São João Paulo II ne’ebé mai husi RAEOA. Ita-nia ekipa boot ida lidera Diretór Edukasaun RAEOA hanesan mós xefe komisaun organizadora hamutuk ho sarani sira simu mahein edukasaun ne’e entusiazmu ”, Prezidente Komisaun Organizadora atuál Sekretáriu Administrasaun Finansa, Alberto Moniz de Araújo, dehan ba jornalista iha Igreja Ave Maria Suai, ohin.
RAEOA entrega illas mai iha Kovalima no durante tinan ida iha Kovalima, nune’e segunda sei hala’o misa abertura hafoin vizita Eskola Bázika São Luis Gonzaga kontinua vizita eskola ensinu superiór, eskola sekundáriu Jerál,Eskola Tékniku Vokasionál, ensinu Báziku Centrál (EBC), eskola Báziku Filiál to’o eskola pre-eskolár.
“Autoridade Kovalima hamutuk ho Sarani sira orgullu simu illas São João Paulo II tanba illas São João Paulo II iha RAEOA hatudu sinál di’ak liuliu halo profesór sira rekonsilia malu. Ita nia esperansa boot iha Kovalima mós sei akontese vizita illas São João Paulo II durante tinan ida sei hatudu milagre ruma ba ita iha Kovalima espesiál ba vizita eskola sira”, nia espera.
Iha fatin hanesan, Prezidente Komisaun Organizadora Edukasaun RAEOA, Vicêncio Cono, dehan durante prezenta illas mahein São João Paulo II iha RAEOA hatudu nia milagre lubuk ida ba profesór sira.
“Mahein edukasaun mak illas São João Paulo II iha RAEOA hatudu nia milagre barak tanba profesór sira simu malu no rekonsilia malu hodi prátika pás no dame iha eskola,” nia fó sasin.
Jornalista: Celestina Teles
Editór: Florencio Miranda Ximenes
