DILI, 26 Janeiru 2026 (TATOLI)—Atleta Paralímpiku na’in-haat husi modalidade rua kompostu Para-atletizmu no Para-ténis Meza oferese medalla lima ba Timor-Leste hafoin partisipa iha torneiu Asian Para Games 2026 ba da-13 ne’ebé realiza iha Tailándia.
Atleta Paralímpiku na’in-haat referidu kompostu husi Teófilo Freitas rekolla medalla osan-mean rua husi modalidade Para-atletizmu kategoria T37-T38 (ema ho defisiénsia ain) hafoin manán iha numéru halai metru 1500 no metru 400.
Medalla osan-mean seluk, gaña husi atleta Joãozinho Fernandes Araújo hafoin sai vensedór iha modalidade Para-atletizmu kategoria T13 (ema ho defisiénsia matan) ho numéru halai metru 5.000.
Enkuantu, atleta na’in-rua hanesan Romero de Jesus gaña medalla osan-mutin hafoin kompete iha modalidade Para-atletizmu kategória T13 ho numéru halai metru 5.000 no atleta Abelita Borges Fernandes Soares ho kategoria klase TT6-7 (ema ho defisiénsia liman) ne’ebé kompete iha modalidade Para-ténis Meza rekolla medalla osan-metan hafoin iha meiu finál derrota ho atleta husi Filipina Jhona Pena.
Totál atleta Paralímpiku husi Timor-Leste ne’ebé partisipa iha Asian Para Games hamutuk na’in-23 ho modalidade lima kompostu Para-atletizmu na’in-lima, Para-ténis Meza na’in-neen, Para-badminton na’in-haat, Para Hiit-besi na’in-tolu no Para Xadrex na’in-lima.
Jornalista: Natalino Belo
Editór: Xisto Freitas da Piedade
