DILI, 26 Janeiru 2026 (TATOLI)—Dirasaun Nasionál Transporte Terrestre (DNTT) seidauk halo atendimentu ba prosesu renova no trata xapa matríkula foun tanba sei hein despaixu publika iha Jornál Repúblika.
Diretora Dirasaun Nasionál Transporte Terrestre (DNTT), Maria Antónia, hateten kona-ba atendimentu ba xapa matríkula foun ne’e seidauk implementa tanba Konsellu Ministru foin mak aprova no ita sei hein promulgasaun ne’ebé públika iha Jornál da Repúblika.
“Ami sei halo sensibilizasaun uluk kona-ba dekretu-lei ne’e hafoin bele implementa ba públiku,” Diretora Dirasaun Nasionál Transporte Terrestre (DNTT), Maria Antónia, hateten ba Agência Tatoli iha nia kna’ar fatin, Balide, ohin.
Enkuantu, rekezitu ba trata xapa matríkula foun ne’e sira sei halo bazeia ba rezidénsia husi kartaun eleitorál, bele mós trata iha nasionál karik sistema deteta iha maibé bainhira sistema deteta iha munísipiu obrigatoriamente kliente tenke ba trata iha ninia munisípiu rasik.
“Tanba DNTT mós destaka ona ninia Dirasaun sira iha munisípiu hotu-hotu, nune’e sira sei halo atendimentu ba asuntu ida-ne’e bainhira dekretu-lei ne’e entrada ona ninia vigór”, nia afirma.
Enkuantu bainhira atu trata xapa matríkula foun sidadaun sira tenke lori ho dokumentu veíkulu no selu tuir taxa administrativa, kona-ba osan ami labele hateten lai tanba dekretu-lei ne’e seidauk promulga iha Jornál da Repúblika, bainhira públika ona foin ami fó sai.
“Bainhira kir motór mate selu $20, mate liu loron ida sei selu multa $60, no kir karreta mate sei selu $30, mate liu loron ida ba leten sei selu $90,” nia dehan .
Jornalista : Alexandra da Costa
Editór : Cancio Ximenes
